ਡੋਨਾਲਡ ਟਰੰਪ ਖ਼ਿਲਾਫ਼ ਮਹਾਂਦੋਸ਼ ਦੀ ਕਾਰਵਾਈ ਲਈ ਸੈਸ਼ਨ ਸ਼ੁਰੂ

ਏਜੰਸੀਆਂ
ਵਾਸ਼ਿੰਗਟਨ/13 ਜਨਵਰੀ : ਅਮਰੀਕੀ ਪ੍ਰਤੀਨਿਧੀ ਸਦਨ ਵਿਚ ਡੋਨਾਲਡ ਟਰੰਪ ਖ਼ਿਲਾਫ਼ ਮਹਾਂਦੋਸ਼ ਦੀ ਕਾਰਵਾਈ ਲਈ ਸੈਸ਼ਨ ਸ਼ੁਰੂ ਹੋ ਚੁੱਕਾ ਹੈ । ਬੁੱਧਵਾਰ ਦੇਰ ਰਾਤ ਤੱਕ ਇਸ ’ਤੇ ਵੋਟਿੰਗ ਹੋ ਸਕਦੀ ਹੈ ।
6 ਜਨਵਰੀ ਨੂੰ ਕੈਪੀਟੋਲ ਵਿਚ ਹੋਈ ਹਿੰਸਾ ਵਿਚ ਟਰੰਪ ਦੀ ਭੂਮਿਕਾ ਹੋਣ ਦਾ ਦੋਸ਼ ਲਾਇਆ ਗਿਆ ਹੈ । ਸਦਨ ਵਿਚ ਪਹਿਲੀ ਬਹਿਸ ਤਕਰੀਬਨ ਇਕ ਘੰਟਾ ਚੱਲੇਗੀ। ਉਸ ਤੋਂ ਬਾਅਦ ਸਦਨ ਵੋਟ ਕਰੇਗਾ । ਹਾਲਾਂਕਿ, ਭਾਵੇਂ ਹੀ ਉਨ੍ਹਾਂ ’ਤੇ ਅੱਜ ਮਹਾਂਦੋਸ਼ ਸ਼ੁਰੂ ਹੋ ਰਿਹਾ ਹੈ, ਪਰ ਟਰੰਪ ਫਿਲਹਾਲ ਆਪਣੇ ਅਹੁਦੇ ’ਤੇ ਬਣੇ ਰਹਿਣਗੇ ਅਤੇ ਸੰਭਾਵਤ ਤੌਰ ’ਤੇ 20 ਜਨਵਰੀ ਤੱਕ ਦਾ ਕਾਰਜਕਾਲ ਪੂਰਾ ਕਰ ਸਕਦੇ ਹਨ, ਕਿਉਂਕਿ ਮਹਾਂਦੋਸ਼ ਲੱਗਣ ਤੋਂ ਬਾਅਦ ਵੀ ਉਨ੍ਹਾਂ ਨੂੰ ਹਟਾਉਣ ਲਈ ਸੈਨੇਟ ਵੱਲੋਂ ਦੋਸ਼ੀ ਠਹਿਰਾਇਆ ਜਾਣਾ ਜ਼ਰੂਰੀ ਹੋਵੇਗਾ ।
ਪ੍ਰਤੀਨਿਧ ਸਦਨ ਯਾਨੀ ਹੇਠਲੇ ਸਦਨ ਵਿਚ ਡੈਮੋਕਰੇਟ ਰਾਸ਼ਟਰਪਤੀ ਟਰੰਪ ਦਾ ਪਿਛਲੇ ਹਫ਼ਤੇ ਸੰਸਦ ’ਤੇ ਹੋਏ ਹਮਲੇ ਵਿਚ ਉਨ੍ਹਾਂ ਦਾ ਹੱਥ ਹੋਣ ਦਾ ਦੋਸ਼ ਲਾ ਰਹੇ ਹਨ । ਉਮੀਦ ਕੀਤੀ ਜਾ ਰਹੀ ਹੈ ਕਿ ਹੇਠਲੇ ਸਦਨ ਵਿਚ ਸਥਾਨਕ ਸਮੇਂ ਦੁਪਹਿਰ ਤਿੰਨ ਵਜੇ ਤੱਕ ਮਹਾਂਦੋਸ਼ ਲਈ ਵੋਟਿੰਗ ਹੋ ਸਕਦੀ ਹੈ, ਜੋ ਕਿ ਟਰੰਪ ਖਿਲਾਫ਼ ਕਾਰਵਾਈ ਦੀ ਅਧਿਕਾਰਤ ਸ਼ੁਰੂਆਤ ਹੋਵੇਗੀ ।