ਮੋਰਿੰਡਾ, 4 ਮਈ (ਲਖਵੀਰ ਸਿੰਘ) : ਮੋਰਿੰਡਾ ਇਲਾਕੇ ਦੇ ਪਿੰਡ ਡੂਮਛੇੜੀ ਅਤੇ ਚਲਾਕੀ ਦੇ ਖੇਤਾਂ ਵਿੱਚ ਕਣਕ ਦੇ ਨਾੜ ਨੂੰ ਅੱਗ ਲੱਗ ਗਈ। ਬੜੀ ਮੁਸ਼ਕਿਲ ਨਾਲ ਦੋ ਫਾਇਰ ਬਿ੍ਰਗੇਡਾਂ ਨੇ ਆ ਕੇ ਕਿਸਾਨਾਂ ਦੀ ਮਦਦ ਨਾਲ ਅੱਗ ਤੇ ਕਾਬੂ ਪਾਇਆ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਭਾਰਤੀ ਕਿਸਾਨ ਯੂਨੀਅਨ ਰਾਜੇਵਾਲ ਦੇ ਸੂਬਾ ਜਨਰਲ ਸਕੱਤਰ ਪਰਮਿੰਦਰ ਸਿੰਘ ਚਲਾਕੀ, ਹਰਵਿੰਦਰ ਸਿੰਘ ਚਲਾਕੀ, ਕੁਲਵੀਰ ਸਿੰਘ, ਜਗਪਾਲ ਸਿੰਘ, ਮਨਿੰਦਰ ਸਿੰਘ, ਦਲੀਪ ਸਿੰਘ ਆਦਿ ਨੇ ਦੱਸਿਆ ਕਿ ਬਿਜਲੀ ਵਿਭਾਗ ਵਲੋਂ ਅੱਜ ਤੋਂ ਦਿਨ ਵਿੱਚ ਟਿਊਬਵੈਲਾਂ ਦੀ ਬਿਜਲੀ ਸਪਲਾਈ 9 ਤੋਂ 5 ਤੱਕ ਦੇਣੀ ਸ਼ੁਰੂ ਕੀਤੀ ਹੈ। ਅੱਗ ਲੱਗਣ ਦਾ ਕਾਰਨ ਵੀ ਬਿਜਲੀ ਦੀਆਂ ਤਾਰਾਂ ਭਿੜਨ ਕਾਰਨ ਨਿਕਲੀਆਂ ਚੰਗਿਆੜੀਆਂ ਦੱਸੀਆਂ ਜਾ ਰਹੀਆਂ ਹਨ। ਸ੍ਰੀ ਚਲਾਕੀ ਨੇ ਦੱਸਿਆ ਕਿ ਅੱਗ ਡੂਮਛੇੜੀ ਦੇ ਖੇਤਾਂ ਚ ਨੂੰ ਹੁੰਦੀ ਹੋਈ ਰੇਲਵੇ ਲਾਈਨ ਤੱਕ ਪਹੁੰਚ ਗਈ। ਇਸੇ ਤਰਾਂ ਪਿੰਡ ਚਲਾਕੀ ਦੇ ਨੇੜਲੇ ਖੇਤਾਂ ਵਿੱਚ ਅੱਗ ਲੱਗਣ ਉਪਰੰਤ ਸ਼ਾਹਪੁਰ, ਬਹਿਬਲਪੁਰ ਆਦਿ ਪਿੰਡਾਂ ਚ ਨੂੰ ਹੁੰਦੀ ਹੋਈ ਰੇਲਵੇ ਲਾਈਨ ਤੱਕ ਪਹੁੰਚ ਗਈ। ਉਹਨਾਂ ਦੱਸਿਆ ਕਿ ਨਾੜ ਸੜਨ ਤੋਂ ਬਾਅਦ ਹੇਠਾਂ ਕਣਕ ਦੇ ਜਾੜਿਆਂ ਨੂੰ ਵੀ ਅੱਗ ਨੇ ਆਪਣੀ ਲਪੇਟ ਵਿੱਚ ਲੈ ਲਿਆ ਤੇ ਤੇਜੀ ਨਾਲ ਅੱਗ ਤੇ ਧੂੰਆਂ ਰੇਲਵੇ ਲਾਈਨ ਤੱਕ ਪਹੁੰਚ ਗਿਆ। ਉਹਨਾਂ ਦੱਸਿਆ ਕਿ ਮੋਰਿੰਡਾ ਤੋਂ ਸਰਹਿੰਦ ਨੂੰ ਜਾਣ ਵਾਲੀ ਯਾਤਰੂ ਰੇਲ ਗੱਡੀ ਦੇ ਡਰਾਇਵਰ ਨੇ ਅੱਗ ਤੇ ਧੂੰਆਂ ਦੇਖਦਿਆਂ ਗੱਡੀ ਨੂੰ ਮੋਰਿੰਡਾ ਸਾਈਡ ਤੇ ਹੀ ਰੋਕ ਦਿੱਤਾ। ਲਗਭਗ ਵੀਹ ਮਿੰਟ ਗੱਡੀ ਰੁਕੀ ਰਹੀ। ਅੱਗ ਤੇ ਕਾਬੂ ਪਾਉਣ ਤੋਂ ਬਾਅਦ ਹੀ ਰੇਲ ਗੱਡੀ ਸਰਹਿੰਦ ਵੱਲ ਨੂੰ ਰਵਾਨਾ ਹੋਈ। ਉਪਰੋਕਤ ਕਿਸਾਨਾਂ ਦਾ ਕਹਿਣਾ ਹੈ ਕਿ ਜਦੋਂ ਤੱਕ ਕਿਸਾਨ ਕਣਕ ਦੇ ਨਾੜ ਤੋਂ ਤੂੜੀ ਨਹੀਂ ਬਣਾ ਲੈਂਦੇ ਉੱਦੋਂ ਤੱਕ ਲਗਭਗ ਦਸ ਦਿਨ ਬਿਜਲੀ ਸਪਲਾਈ ਦਾ ਸਮਾਂ ਦਿਨ ਵਿੱਚ ਨਾ ਕੀਤਾ ਜਾਵੇ। ਤਾਂ ਜੋ ਕਿਸਾਨਾਂ ਦੇ ਪਸ਼ੂਆਂ ਦਾ ਸਾਲ ਭਰ ਦਾ ਚਾਰਾ ਅੱਗ ਦੀ ਭੇਂਟ ਨਾ ਚੜ ਜਾਵੇ।