ਚੰਡੀਗੜ੍ਹ, 3 ਅਪ੍ਰੈਲ (ਦਸਨਸ) : ਸਾਬਕਾ ਕੇਂਦਰੀ ਮੰਤਰੀ ਤੇ ਲੋਕ ਭਲਾਈ ਪਾਰਟੀ ਦੇ ਕੌਮੀ ਪ੍ਰਧਾਨ ਸ.ਬਲਵੰਤ ਸਿੰਘ ਰਾਮੂਵਾਲੀਆ ਨੇ ਕਿਹਾ ਹੈ ਕਿ ਪਾਰਟੀ ਦੇ ਸੰਜੀਦਾ ਤੇ ਸਰਗਰਮ ਨੇਤਾਵਾਂ ਤੇ ਵਰਕਰਾਂ ਨੇ ਵੱਡੀ ਗਿਣਤੀ ਵਿੱਚ ਸੁਝਾਅ ਦਿੱਤੇ ਹਨ ਕਿ ਪਾਰਟੀ ਨੂੰ ਪੂਰੀ ਸ਼ਕਤੀ ਝੋਕ ਕੇ ਸਿਰਫ਼ ਉਨਾਂ ਰਾਜਸੀ ਪਾਰਟੀਆਂ ਨੂੰ ਮਜ਼ਬੂਤ ਕਰਨਾ ਚਾਹੀਦਾ ਹੈ ਜੋ ਪੰਜਾਬ, ਦੂਜੇ ਪ੍ਰਾਂਤਾਂ ਅਤੇ ਵਿਸ਼ਵ ਵਿੱਚ ਵਸਦੇ ਪੰਜਾਬੀਆਂ ਦੀਆਂ ਔਕੜਾਂ ਪ੍ਰਤੀ ਸਮਰਪਿਤ ਤੇ ਸੱਚੇ ਦਿਲੋਂ ਸੰਜੀਦਾ ਹਨ। ਇਸ ਲਈ 7 ਅਪ੍ਰੈਲ ਨੂੰ ਪਾਰਟੀ ਦੇ ਮੁੱਖ ਦਫ਼ਤਰ ਰਾਜਗੁਰੂ ਨਗਰ, ਲੁਧਿਆਣਾ ਵਿਖੇ ਜ਼ਰੂਰੀ ਤੇ ਨੀਤੀ ਨਿਰਧਾਰਨ ਮੀਟਿੰਗ 11 ਵਜੇ ਸਵੇਰੇ ਹੋਵੇਗੀ। ਸਭ ਨੂੰ ਬੇਨਤੀ ਹੈ ਕਿ ਕਿਸਾਨਾਂ ਦੇ ਮਹਾਨ ਸਿਦਕੀ ਸੰਘਰਸ਼, ਸਾਬਕਾ ਫੌਜੀਆਂ, ਰਿਟਾਇਰਡ ਕਰਮਚਾਰੀਆਂ, ਨੌਜਵਾਨਾਂ ਦੇ ਰੋਜ਼ ਬਰਬਾਦ ਹੋ ਰਹੇ ਸੁਫ਼ਨੇ ਅਤੇ ਸਰੀਰ, ਪ੍ਰਵਾਸੀ ਪੰਜਾਬੀਆਂ ਦੀਆਂ ਸਮੱਸਿਆਵਾਂ, ਮਹਿੰਗੇ ਇਲਾਜ, ਟਰੈਵਲ ਏਜੰਟਾਂ ਵੱਲੋਂ ਬੇਰਹਿਮ ਲੁੱਟ ਕਾਰਨ ਬਰਬਾਦ ਲੋਕ , ਅਗਨੀਵੀਰ ਫੌਜੀਆਂ, ਟਰੱਕ, ਟੈਕਸੀ, ਕੈਂਟਰ ਟੈਂਪੂ ਵਾਲਿਆਂ ਦੇ ਦੁਖੜੇ, ਬਰਬਾਦ ਹੁੰਦੇ ਬੇਰੋਜ਼ਗਾਰਾਂ ਦੇ ਮਸਲੇ, ਵਰਤਮਾਨ ਮੌਜੂਦਾ ਐਮਪੀ, ਐਮਐਲਏ ਤੇ ਉਹਨਾਂ ਦਾ ਆਪਣਾ ਅਤੇ ਉਹਨਾਂ ਦੀ ਪਾਰਟੀ ਦਾ ਸੇਵਾ, ਸੰਜੀਦਗੀ ਅਤੇ ਚੰਗੇ ਮਾੜੇ ਨਤੀਜਿਆਂ ਦਾ ਰਿਕਾਰਡ ਲੈਕੇ ਆਉਣ ਤਾਂ ਜੋ ਠੋਸ ਰਣਨੀਤੀ ਬਣਾਈ ਜਾਵੇ।