ਆਰਟੀਏ ਨੇ ਸ਼ਖਤੀ ਵਿਖਾਉਂਦੇ ਹੋਏ ਕਈ ਵਾਹਨਾਂ 'ਤੇ ਲੱਖਾਂ ਰੁਪਏ ਦਾ ਕੀਤਾ ਜੁਰਮਾਨਾ 

ਪੀ.ਪੀ. ਵਰਮਾ
ਪੰਚਕੂਲਾ, 13 ਅਪ੍ਰੈਲ :  ਪੰਚਕੂਲਾ ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਕਨੀਨਾ ਵਿੱਚ ਸਕੂਲ ਬੱਸ ਹਾਦਸੇ ਵਿੱਚ ਚਾਰ ਵਿਦਿਆਰਥੀਆਂ ਦੀ ਮੌਤ ਤੋਂ ਬਾਅਦ ਪ੍ਰਸ਼ਾਸਨ ਚੌਕਸ ਹੋ ਗਿਆ ਹੈ। ਆਰਟੀਏ ਨੇ ਫਿਟਨੈਸ ਅਤੇ ਟੈਕਸ ਅਦਾ ਨਾ ਕਰਨ ਵਾਲੇ ਅੱਠ ਸਕੂਲੀ ਵਾਹਨਾਂ ਅਤੇ ਦੋ ਯਾਤਰੀ ਬੱਸਾਂ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਹੈ। ਆਰਟੀਏ ਨੇ ਇਹ ਸਾਰੇ ਵਾਹਨ ਜ਼ਬਤ ਕਰ ਲਏ ਹਨ ਅਤੇ ਲੱਖਾਂ ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ। ਆਰਟੀਏ ਸਕੱਤਰ ਹੈਰਤਜੀਤ ਕੌਰ ਬਰਾੜ ਦੇ ਹੁਕਮਾਂ ’ਤੇ ਆਰਟੀਏ ਵਿਭਾਗ ਦੇ ਸਬ ਇੰਸਪੈਕਟਰ ਨਰਿੰਦਰ ਯਾਦਵ ਨੇ ਜ਼ਿਲ੍ਹੇ ਵਿੱਚ ਚੱਲ ਰਹੀਆਂ ਸਕੂਲੀ ਬੱਸਾਂ ਦਾ ਨਿਰੀਖਣ ਕੀਤਾ। ਕਈ ਬੱਸਾਂ ਅਤੇ ਵੈਨਾਂ ਦੀ ਫਿਟਨੈਸ ਠੀਕ ਨਹੀਂ ਸੀ। ਕਈ ਬੱਸਾਂ ਨੇ ਰੋਡ ਟੈਕਸ ਜਮ੍ਹਾ ਨਹੀਂ ਕਰਵਾਇਆ ਸੀ। ਉਨ੍ਹਾਂ ਪੰਜ ਸਕੂਲੀ ਬੱਸਾਂ ਅਤੇ ਤਿੰਨ ਵੈਨਾਂ ਨੂੰ ਜ਼ਬਤ ਕਰ ਲਿਆ ਹੈ ਅਤੇ ਸਾਰੇ ਵਾਹਨਾਂ ਨੂੰ ਜੁਰਮਾਨਾ ਕੀਤਾ ਹੈ। ਆਰਟੀਏ ਵਿਭਾਗ ਨੇ ਸੈਕਟਰ-16 ਵਿੱਚ ਪੰਚਕੂਲਾ ਤੋਂ ਉੱਤਰ ਪ੍ਰਦੇਸ਼ ਜਾ ਰਹੀ ਇੱਕ ਬੱਸ ਨੂੰ ਜ਼ਬਤ ਕਰ ਲਿਆ। ਬੱਸ ਦਾ 52 ਹਜ਼ਾਰ ਰੁਪਏ ਦਾ ਚਲਾਨ ਕੀਤਾ ਗਿਆ ਹੈ। ਉੱਥੇ ਦੇਰ ਰਾਤ ਨੂੰ ਪੁਰਾਣੇ ਪੰਚਕੂਲਾ ਵਿੱਚ ਆਰਟੀਏ ਵਿਭਾਗ ਨੇ ਪੰਚਕੂਲਾ ਤੋਂ ਉੱਤਰ ਪ੍ਰਦੇਸ਼ ਜਾ ਰਹੀ ਇੱਕ ਓਵਰਲੋਡ ਬੱਸ ਨੂੰ ਫੜਿਆ। ਬੱਸ ਵਿੱਚ ਸਮਰੱਥਾ ਤੋਂ ਵੱਧ ਸਵਾਰੀਆਂ ਨੂੰ ਬਿਠਾਇਆ ਗਿਆ ਅਤੇ ਬੱਸ ਨੂੰ ਸਲੀਪਰ ਕੋਚ ਬਣਾਉਣ ਲਈ ਸੋਧਿਆ ਗਿਆ। ਅਧਿਕਾਰੀ ਨੇ ਬੱਸ ਨੂੰ ਜ਼ਬਤ ਕਰ ਲਿਆ ਅਤੇ 1.11 ਲੱਖ ਰੁਪਏ ਜੁਰਮਾਨਾ ਕੀਤਾ।