ਦਸਵੀ ਦੇ ਨਤੀਜ਼ੇ ਵਿਚ ਪੰਜਾਬ ਦੀ ਮੈਰਿਟ ਸੂਚੀ ਤੇ 17ਵਾਂ ਰੈਕ ਤੇ ਜਿਲ੍ਹੇ ਵਿਚ ਦੂਸਰਾ ਸਥਾਨ
ਖਰੜ,18 ਅਪ੍ਰੈਲ (ਕੁਲਦੀਪ ਸਿੰਘ ਢਿਲੋਂ) : ਸਰਕਾਰੀ ਹਾਈ ਸਮਾਰਟ ਸਕੂਲ ਦੇਸੂਮਾਜਰਾ ਦੀ ਵਿਦਿਆਰਥਣ ਅਨੂ ਕੁਮਾਰੀ ਨੇ ਪੰਜਾਬ ਸਕੂਲ ਸਿੱਖਿਆ ਬੋਰਡ ਵਲੋਂ ਅੱਜ ਐਲਾਨ ਕੀਤੇ ਗਏ 10ਵੀਂ ਦੇ ਨਤੀਜ਼ੇ ਵਿਚ 629/650 (96.77 ਫੀਸਦੀ) ਅੰਕ ਪ੍ਰਾਪਤ ਕਰਕੇ ਪੰਜਾਬ ਦੀ ਮੈਰਿਟ ਸੂਚੀ ਵਿਚ 17ਵਾਂ ਰੈਕ ਅਤੇ ਜਿਲ੍ਹਾ ਐਸ.ਏ.ਐਸ. ਨਗਰ ਵਿਚ ਦੂਸਰਾ ਸਥਾਨ ਪ੍ਰਾਪਤ ਕਰਕੇ ਸਕੂਲ ਅਤੇ ਆਪਣੇ ਮਾਪਿਆਂ ਤੇ ਸਕੂਲ ਦੇ ਅਧਿਆਪਕਾਂ ਦਾ ਨਾਂ ਰੋਸ਼ਨ ਕੀਤਾ ਹੈ। ਸਰਕਾਰੀ ਹਾਈ ਸਮਾਰਟ ਸਕੂਲ ਦੇਸੂਮਾਜਰਾ ਵਿਖੇ ਅਧਿਆਪਕਾਂ ਦੀ ਹਾਜ਼ਰੀ ਵਿਚ ਗੱਲ ਕਰਦਿਆ ਅਨੂਕੁਮਾਰੀ ਨੇ ਦਸਿਆ ਕਿ ਉਹ ਆਈ.ਏ.ਐਸ.ਅਫਸਰ ਬਣਨਾ ਚਾਹੁੰਦੀ ਹੈ, ਜਦੋ ਉਹ 7 ਸਾਲ ਦੀ ਹੁੰਦੀ ਸੀ ਕਿ ਉਸਦੇ ਪਿਤਾ ਨੇ ਇੱਕ ਫਿਲਮ ਦਿਖਾਈ ਸੀ ਕਿ ਇੱਕ ਆਈ.ਏ.ਐਸ.ਅਫਸਰ ਦੀ ਕੀ ਪਾਵਰ ਹੈ ਅਤੇ ਉਹ ਕਿਵੇਂ ਕੰਮ ਕਰਦਾ ਹੈ। ਉਹ ਆਈ.ਏ.ਐਸ ਅਫਸਰ ਦੀ ਪ੍ਰੀਖਿਆ ਪਾਸ ਕਰਕੇ ਗਰਾਊਡ ਪੱਧਰ ਤੇ ਸੇਵਾ ਕਰਨ ਦੀ ਇਛੁੱਕ ਹੈ। ਉਸਦਾ ਕਹਿਣਾ ਕਿ 8ਵੀ ਤੱਕ ਸਰਕਾਰੀ ਮਿਡਲ ਸਮਾਰਟ ਸਕੂਲ ਜੰਡਪੁਰ ਤੋਂ ਪੜਾਈ ਕੀਤੀ ਅਤੇ 9ਵੀਂ ਕਲਾਸ ਸਰਕਾਰੀ ਹਾਈ ਸਮਾਰਟ ਸਕੂਲ ਦੇਸੂਮਾਜਰਾ ਵਿਚ ਦਾਖਲਾ ਲਿਆ ਸੀ। ਉਸਦਾ ਕਹਿਣਾ ਕੋਈ ਟਿਊਸ਼ਨ ਨਹੀ। ਰੋਜ਼ਾਨਾ ਚਾਰ ਤੋਂ ਪੰਜ ਘੰਟੇ ਆਪਣੀ ਸਕੂਲ ਦੀ ਪੜਾਈ ਕਰਦੀ ਹੈ। ਉਨ੍ਹਾਂ ਇਸ ਪ੍ਰਾਪਤੀ ਦਾ ਸਿਹਰਾ ਆਪਣੇ ਮਾਤਾ,ਪਿਤਾ ਅਤੇ ਸਕੂਲ ਅਧਿਆਪਕਾਂ ਨੂੰ ਦਿੱਤਾ ਜਿਨ੍ਹਾਂ ਦੀ ਪ੍ਰੇਰਨਾ ਸਦਕਾ ਉਹ ਇਹ ਮੰਜਿਲ ਤੇ ਪੁੱਜੀ ਹੈ। ਕਲਾਸ ਇੰਚਾਰਜ਼ ਪਰਮਿੰਦਰ ਕੌਰ ਨੇ ਦਸਿਆ ਕਿ ਇਹ ਵਿਦਿਆਰਥਣ ਪੜਾਈ ਵਿਚ ਸ਼ੁਰੂ ਤੋਂ ਹੀ ਹੁਸ਼ਿਆਰ ਹੈ ਅਤੇ ਇਸਦੀ ਛੋਟੀ ਭੈਣ ਜੋ ਸਰਕਾਰੀ ਮਿਡਲ ਸਮਾਰਟ ਸਕੂਲ ਜੰਡਪੁਰ ਵਿਚ ਪੜ੍ਹ ਰਹੀ ਹੈ ਉਹ ਵੀ ਪੜ੍ਹਣ ਲਈ ਹੁਸ਼ਿਆਰ ਹੈ। ਜਿਕਰਯੋਗ ਹੈ ਕਿ ਵਿਦਿਆਰਥਣ ਅਨੂ ਕੁਮਾਰ ਦਾ ਪਿਛੋਕੜ ਬਿਹਾਰ ਸੂਬੇ ਦੇ ਜਿਲ੍ਹਾ ਗੋਪਾਲਗੰਜ਼ ਦੇ ਨਾਲ ਹੈ ਅਤੇ ਉਹ ਪ੍ਰਵਾਸੀ ਮਜ਼ਦੂਰ ਪਰਿਵਾਰ ਹੈ ਅਤੇ ਇਸ ਸਮੇਂ ਨਗਰ ਕੌਸਲ ਖਰੜ ਦੀ ਹਦੂਦ ਅੰਦਰ ਪੈਂਦੇ ਪਿੰਡ ਹਰਲਾਲਪੁਰ ਵਿਖੇ ਕਿਰਾਏ ਦੇ ਮਕਾਨ ਵਿਚ ਰਹਿੰਦੇ ਹਨ, ਪਿਤਾ ਚੰਦਰ ਮੋਹਨ ਪੇਟਰ ਦਾ ਕੰਮ ਕਰਦਾ ਹੈ ਜਦਕਿ ਉਸਦੀ ਮਾਤਾ ਘਰੇਲੂ ਕੰਮਕਾਰ। ਉਹ ਤਿੰਨ ਭੈਣਾਂ ਹਨ। ਸਕੂਲ ਦੀ ਮੁੱਖ ਅਧਿਆਪਕਾ ਖੁਸ਼ਵਿੰਦਰ ਕੌਰ ਅਤੇ ਇੰਚਾਰਜ਼ ਤੇ ਸਟਾਫ ਮੈਬਰਾਂ ਵਲੋਂ ਅਨੂ ਕੁਮਾਰੀ ਦਾ ਮੂੰਹ ਮਿੱਠਾ ਕਰਵਾਇਆ ਅਤੇ ਵਧਾਈ ਦਿੱਤੀ। ਇਸ ਮੌਕੇ ਸਕੂਲ ਅਧਿਆਪਕ ਰਾਜ ਕਮਲ, ਮੋਨਿਕਾ, ਸਰਬਜੀਤ ਕੌਰ ਸਮੇਤ ਹੋਰ ਸਟਾਫ ਮੈਂਬਰ ਹਾਜ਼ਰ ਸਨ।