ਤਿਰਪਾਲਾਂ ਦੀ ਘਾਟ ਕਾਰਨ ਧਨੌਨੀ ਮੰਡੀ 'ਚ ਫੇਰ ਭਿੱਜੀਆਂ ਕਣਕ ਦੀਆਂ ਢੇਰੀਆਂ
ਡੇਰਾਬੱਸੀ, 19 ਅਪ੍ਰੈਲ (ਗੁਰਜੀਤ ਸਿੰਘ ਈਸਾਪੁਰ) : ਅੱਜ ਬਾਅਦ ਦੁਪਹਿਰ ਪਏ ਬੇਮੌਸਮੇ ਮੀਂਹ ਨੇ ਇੱਕ ਵਾਰ ਫੇਰ ਤੋਂ ਡੇਰਾਬੱਸੀ ਦੀ ਧਨੌਨੀ ਅਨਾਜ ਮੰਡੀ ਵਿਚਲੇ ਖਸਤਾ ਹਾਲਤ ਪ੍ਰਬੰਧਾਂ ਦੀ ਪੋਲ ਖੋਲ ਕੇ ਰੱਖ ਦਿੱਤੀ ਹੈ। ਮਾਰਕੀਟ ਕਮੇਟੀ ਅਧਿਕਾਰੀਆਂ ਅਤੇ ਆੜਤੀਆਂ ਦੀ ਮਿਲੀਭੁਗਤ ਦਾ ਖਾਮਿਆਜਾ ਮੰਡੀ ਵਿੱਚ ਫਸਲ ਲੈ ਕੇ ਆਏ ਕਿਸਾਨਾਂ ਨੂੰ ਭੁਗਤਣਾ ਪੈ ਰਿਹਾ ਹੈ, ਕਿਉਂਕਿ ਨਿਯਮਾਂ ਨੂੰ ਪੂਰਾ ਨਾ ਕਰਨ ਵਾਲੇ ਆੜਤੀਆਂ ਖਿਲਾਫ ਅਧਿਕਾਰੀਆਂ ਵੱਲੋਂ ਕੋਈ ਕਾਰਵਾਈ ਨਹੀਂ ਕੀਤੀ ਜਾਂਦੀ। ਜਿਸ ਦੇ ਫ਼ਲਸਰੂਪ ਮੰਡੀ ਵਿੱਚ ਬੁਨਿਆਦੀ ਸਹੂਲਤਾਂ ਨੂੰ ਤਰਸ ਰਹੇ ਕਿਸਾਨਾਂ ਨੂੰ ਪਰੇਸ਼ਾਨੀਆਂ ਝੱਲਣੀਆਂ ਪੈ ਰਹੀਆਂ ਹਨ। ਤਾਜ਼ਾ ਮਾਮਲੇ ਵਿੱਚ ਜਿਆਦਾਤਰ ਆੜਤੀਆਂ ਵੱਲੋਂ ਮੀਹ ਪੈਣ ਤੇ ਕਿਸਾਨਾਂ ਨੂੰ ਤਿਰਪਾਲਾਂ ਮੁਹਈਆ ਨਹੀਂ ਕਰਵਾਈਆਂ ਗਈਆਂ ਜਿਸ ਕਾਰਨ ਉਹਨਾਂ ਦੀ ਕਣਕ ਦੀਆਂ ਢੇਰੀਆਂ ਮੀਹ ਵਿੱਚ ਭਿੱਜਦੀਆਂ ਰਹੀਆਂ । ਹੋਰ ਤਾਂ ਹੋਰ ਤਿਰਪਾਲਾਂ ਦੀ ਘਾਟ ਦੇ ਕਾਰਨ ਏਜੰਸੀਆਂ ਵੱਲੋਂ ਖਰੀਦ ਕੀਤੀ ਕਣਕ ਦੀਆਂ ਬੋਰੀਆਂ ਵੀ ਮੀਂਹ ਵਿੱਚ ਭਿੱਜਦੀਆਂ ਦਿਖਾਈ ਦਿੱਤੀਆਂ। ਆੜਤੀਆਂ ਅਤੇ ਅਧਿਕਾਰੀਆਂ ਨੀ ਲਾਪਰਵਾਹੀ ਦੇ ਚਲਦਿਆਂ ਹੁਣ ਕਿਸਾਨਾਂ ਨੂੰ ਦੋ ਤੋਂ ਤਿੰਨ ਦਿਨ ਮੰਡੀ ਵਿੱਚ ਹੋਰ ਕਣਕ ਸੁਕਾਉਣ ਲਈ ਰਹਿਣਾ ਪਵੇਗਾ ।
ਦੱਸਣਯੋਗ ਹੈ ਕਿ ਪਿਛਲੇ ਲੰਬੇ ਸਮੇਂ ਤੋਂ ਕਿਸਾਨਾਂ ਵੱਲੋਂ ਮੰਗ ਕੀਤੀ ਜਾ ਰਹੀ ਹੈ ਕਿ ਇੱਟਾਂ ਦੀ ਥਾਂ ਪੱਕਾ ਸਮਿਟਡ ਫ਼ੜ ਬਣਾਇਆ ਜਾਵੇ ਤਾਂ ਜੋ ਮੌਸਮ ਖਰਾਬ ਹੋਣ ਤੇ ਕਿਸਾਨਾਂ ਨੂੰ ਫਸਲ ਇਕੱਠੀ ਕਰਨ ਵਿੱਚ ਆਸਾਨੀ ਰਹੇ। ਕਿਉਂਕਿ ਇੱਟਾਂ ਦੇ ਫੜ ਉੱਤੇ ਕਿਸਾਨਾਂ ਨੂੰ ਫਸਲ ਇਕੱਠੀ ਕਰਨ ਲਈ ਕਾਫੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਜਦੋਂ ਮੰਡੀ ਸੁਪਰਵਾਈਜ਼ਰ ਪੰਕਜ ਕੁਮਾਰ ਨਾਲ ਗੱਲ ਕੀਤੀ ਗਈ ਤਾਂ ਉਹਨਾਂ ਆਖਿਆ ਕਿ ਸਾਰੇ ਆੜਤੀਆਂ ਕੋਲ ਤਿਰਪਾਲਾਂ ਹਨ, ਜਿਨ੍ਹਾਂ ਦਾ ਉਨ੍ਹਾਂ ਵੱਲੋਂ ਲਿਖਤੀ ਪੱਤਰ ਵੀ ਦਿੱਤਾ ਹੋਇਆ ਹੈ। ਜੇਕਰ ਫੇਰ ਵੀ ਕਿਸੇ ਆੜਤੀ ਵੱਲੋਂ ਤਰਪਾਲਾਂ ਨਾ ਦਿੱਤੇ ਜਾਣ ਕਾਰਨ ਕਿਸੇ ਕਿਸਾਨ ਦੀ ਫਸਲ ਭਿੱਜੀ ਹੈ ਤਾਂ ਉਸ ਖਿਲਾਫ ਕਾਰਵਾਈ ਕੀਤੀ ਜਾਵੇਗੀ।