ਰਿਕਸ਼ੇ 'ਤੇ ਜਾ ਰਹੀ ਅਧਿਆਪਕਾ ਦੀ ਗਰਦਨ 'ਤੇ ਚਾਕੂ ਰੱਖ ਕੇ ਝਪਟਮਾਰਾਂ ਨੇ ਖੋਹੀ ਸੋਨੇ ਦੀ ਚੈਨੀ

ਸਰਹਿੰਦ ਵਿਖੇ ਦੋ ਮੋਟਰਸਾਈਕਲ ਸਵਾਰ ਨੌਜਵਾਨਾਂ ਵੱਲੋਂ ਇੱਕ ਸਕੂਲ ਅਧਿਆਪਕਾ ਨੂੰ ਜ਼ਖਮੀ ਕਰਕੇ ਉਸਦੀ ਸੋਨੇ ਦੀ ਚੈਨੀ ਖੋਹ ਲੈ ਜਾਣ ਦੀ ਸੂਚਨਾ ਹੈ।ਵਰਿੰਦਰ ਅਰੋੜਾ ਵਾਸੀ ਹਮਾਯੂੰਪੁਰ ਸਰਹਿੰਦ ਨੇ ਦੱਸਿਆ ਕਿ ਉਹ ਇੱਕ ਸਰਕਾਰੀ ਸਕੂਲ 'ਚ ਅਧਿਆਪਕਾ ਵਜੋਂ ਕੰਮ ਕਰਦੀ ਹੈ ਤੇ ਬੀਤੇ ਕੱਲ੍ਹ ਸ਼ਾਮ ਕਰੀਬ ਪੰਜ ਵਜੇ ਉਹ ਸਰਹਿੰਦ ਜੀ.ਟੀ. ਰੋਡ ਤੋਂ ਰਿਕਸ਼ੇ 'ਚ ਬੈਠ ਕੇ ਆਪਣੇ ਘਰ ਨੂੰ ਜਾ ਰਹੀ ਸੀ ਤਾਂ ਹਮਾਯੂੰਪੁਰ ਦੇ ਸੇਵਾ ਕੇਂਦਰ ਕੋਲ ਪਹੁੰਚਣ 'ਤੇ ਪਿੱਛੋਂ ਮੋਟਰਸਾਈਕਲ 'ਤੇ ਸਵਾਰ ਹੋ ਕੇ ਆਏ ਦੋ ਨੌਜਵਾਨਾਂ 'ਚੋਂ ਪਿੱਛੇ ਬੈਠੇ ਸਰਦਾਰ ਨੌਜਵਾਨ ਨੇ ਕੋਲ ਆ ਕੇ ਚਾਕੂ ਉਸਦੀ ਗਰਦਨ 'ਤੇ ਰੱਖ ਦਿੱਤਾ ਤੇ ਗਲੇ 'ਚ ਪਾਈ ਸੋਨੇ ਦੀ ਚੈਨੀ ਖੋਲ੍ਹ ਕੇ ਉਸਦੇ ਹਵਾਲੇ ਕਰਨ ਦੀ ਮੰਗ ਕੀਤੀ ਤੇ ਜਦੋਂ ਉਸਨੇ ਚੈਨੀ ਦੇਣ ਤੋਂ ਇਨਕਾਰ ਕਰ ਦਿੱਤਾ ਤਾਂ ਉਕਤ ਨੌਜਵਾਨਾਂ ਨੇ ਧੱਕਾਮੁੱਕੀ ਕਰਦੇ ਹੋਏ ਉਸਦੀ ਚੈਨੀ ਖੋਹ ਲਈ ਤੇ ਫਰਾਰ ਹੋ ਗਏ।ਪੀੜਤਾ ਦੇ ਪਤੀ ਜਸਵੀਰ ਸਿੰਘ ਨੇ ਦੱਸਿਆ ਕਿ ਥਾਣਾ ਸਰਹਿੰਦ ਦੀ ਪੁਲਿਸ ਨੂੰ ਇਸ ਘਟਨਾ ਬਾਰੇ ਸੂਚਿਤ ਕਰ ਦਿੱਤਾ ਗਿਆ ਹੈ।ਜ਼ਿਕਰਯੋਗ ਹੈ ਕਿ ਵਾਰਦਾਤ ਵਾਲੀ ਜਗ੍ਹਾ ਨੇੜੇ ਸੀ.ਸੀ.ਟੀ.ਵੀ. ਕੈਮਰਿਆਂ ਦੀ ਫੁਟੇਜ਼ 'ਚ ਦੋ ਸ਼ੱਕੀ ਨੌਜਵਾਨ ਰਿਕਸ਼ੇ ਦਾ ਪਿੱਛਾ ਕਰਦੇ ਹੋਏ ਦਿਖਾਈ ਦੇ ਰਹੇ ਹਨ।