ਮੁੱਲਾਂਪੁਰ ਦਾਖਾ, 22 ਅਪ੍ਰੈਲ (ਸਤਿਨਾਮ ਬੜੈਚ) : ਥਾਣਾ ਦਾਖਾ ਦੀ ਪੁਲਿਸ ਨੇ ਹਵਾਈ ਟਿਕਟਾਂ ਦੇਣ ਵਿੱਚ ਧੋਖਾਧੜੀ ਕਰਨ ਦੇ ਦੇਸ਼ ਤਹਿਤ ਸੁੱਖ ਆਨ ਲਾਇਨ ਸਰਵਿਸ ਦੇ ਮਾਲਕ ਸੁਖਵੀਰ ਸਿੰਘ ਉਰਫ ਸੁੱਖ ਦੇ ਖਿਲਾਫ ਕੇਸ ਦਰਜ਼ ਕਰਕੇ ਅਗਲੇਰੀ ਕਾਰਵਾਈ ਆਰੰਭ ਕਰ ਦਿੱਤੀ ਹੈ।
ਕੇਸ ਦੀ ਪੜਤਾਲ ਕਰ ਰਹੇ ਏ.ਐਸ.ਆਈ.ਆਤਮਾ ਸਿੰਘ ਅਨੁਸਾਰ ਪੁਲਿਸ ਦੇ ਉੱਚ ਅਧਿਕਾਰੀਆਂ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਅੰਮ੍ਰਿਤਪਾਲ ਸਿੰਘ ਪੁੱਤਰ ਕੁਲਵਿੰਦਰ ਸਿੰਘ ਵਾਸੀ ਪਿੰਡ ਕੋਟ ਮਾਨਾ ( ਲੁਧਿਆਣਾ) ਨੇ 3 ਅਪ੍ਰੈਲ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਦੱਸਿਆ ਕਿ ਉਸਦਾ ਚਾਚਾ ਗੁਰਿੰਦਰ ਸਿੰਘ ਆਪਣੇ ਪਰਿਵਾਰ ਸਮੇਤ ਆਸਟਰੇਲੀਆਂ ਵਿੱਚ ਰਹਿੰਦਾ ਹੈ, ਜਿਸਨੇ ਆਪਣੇ ਪਰਿਵਾਰ ਸਮੇਤ ਭਾਰਤ ਆਉਣਾ ਸੀ, ਇਸ ਲਈ ਉਸਨੇ ਉਹਨਾਂ ਦੇ ਆਉਣ ਜਾਣ ਲਈ ਚਾਰ ਟਿਕਟਾਂ ਸੁੱਖ ਆਨ ਲਾਇਨ ਸਰਵਿਸ ਜੀ.ਟੀ ਰੋਡ ਮੰਡੀ ਮੁੱਲਾਂਪੁਰ ਤੋਂ ਬੁੱਕ ਕਰਵਾਈਆਂ ਅਤੇ ਸੁੱਖ ਆਨ ਲਾਇਨ ਸਰਵਿਸ ਦੇ ਮਾਲਕ ਸੁਖਵੀਰ ਸਿੰਘ ਉਰਫ ਸੁੱਖ ਪੁੱਤਰ ਹਰਭਿੰਦਰ ਸਿੰਘ ਵਾਸੀ ਧੋਥੜ ਥਾਣਾ ਸਿੱਧਵਾਂ ਬੇਟ ਨੇ ਉਸਨੂੰ ਟਿਕਟਾਂ ਤਾਂ ਦੇ ਦਿੱਤੀਆ ਪਰ ਵਾਪਸੀ ਦੀਆਂ ਟਿਕਟਾਂ ਲਈ ਕਹਿਣ ਲੱਗਾ ਕਿ ਆਨ ਲਾਇਨ ਇੰਟਰਨੈਟ ਵਿੱਚ ਸਮੱਸਿਆ ਆ ਗਈ ਹੈ, ਇਸ ਲਈ ਉਹ ਵਾਪਸੀ ਵਾਲੀਆਂ ਟਿਕਟਾਂ ਕੁੱਝ ਦਿਨਾਂ ਬਾਅਦ ਦੇ ਦੇਵੇਗਾ ਅਤੇ ਉਸ ਨੇ ਫਰਜੀ ਟਿਕਟਾਂ ਦੀ ਪੀ.ਡੀ.ਫਾਈਲ ਬਣਾ ਕੇ ਦੇ ਦਿੱਤੀ, ਜਿਸ ਬਦਲੇ ਉਸਨੇ 1 ਲੱਖ 75 ਹਜਾਰ ਰੁਪਏ ਲੈ ਲਏ ਪਰ ਵਾਪਸੀ ਦੀਆਂ ਟਿਕਟਾਂ ਬਾਅਦ ਵਿੱਚ ਉਸ ਨੇ ਕੈਂਸਲ ਕਰਵਾ ਕੇ ਪੈਸੇ ਆਪਣੇ ਕੋਲ ਰੱਖ ਲਏ। 10 ਮਾਰਚ 2024 ਉਸਦਾ ਚਾਚਾ ਗੁਰਿੰਦਰ ਸਿੰਘ ਆਪਣੀ ਪਤਨੀ ਅਤੇ ਦੋ ਬੱਚਿਆਂ ਦੇ ਨਾਲ ਭਾਰਤ ਆ ਗਿਆ । ਉਨ੍ਹਾ 27 ਮਾਰਚ 2024 ਨੂੰ ਵਾਪਸ ਜਾਣਾ ਸੀ, ਇਸ ਲਈ ਜਦੋਂ ਅਸੀਂ ਸੁੱਖ ਥੋਥੜ ਨਾਲ ਸੰਪਰਕ ਕੀਤਾ ਤਾਂ ਉਸ ਦਾ ਮੋਬਾਇਲ ਫੋਨ ਬੰਦ ਆ ਰਿਹਾ ਸੀ। ਉੱਕਤ ਸ਼ਿਕਾਇਤ ਦੀ ਪੜਤਾਲ ਮੁੱਖ ਅਫਸਰ ਥਾਣਾ ਦਾਖਾ ਜਸਵੀਰ ਸਿੰਘ ਵੱਲੋਂ ਕਰਨ ਉਪਰੰਤ ਐਸ.ਐਸ.ਪੀ. ਜਗਰਾਉਂ ਨਵਨੀਤ ਸਿੰਘ ਬੈਂਸ ਦੇ ਹੁਕਮਾਂ ਅਨੁਸਾਰ ਕੱਥਿਤ ਦੋਸ਼ੀ ਖਿਲਾਫ ਧੋਖਾਧੜੀ ਦਾ ਕੇਸ ਦਰਜ ਕੀਤਾ ਗਿਆ।