ਹਾਈ ਵੋਲਟੇਜ਼ ਖੰਬੇ ਦੀ ਤਾਰ ਡਿੱਗਣ ਨਾਲ ਢਾਈ ਏਕੜ ਫਸਲ ਸੜ ਕੇ ਸੁਆਹ

ਬਰਨਾਲਾ, 4 ਮਈ (ਧਰਮਪਾਲ ਸਿੰਘ) : ਬਠਿੰਡਾ ਰੋਡ ਤੇ ਜੀ.ਮਾਲ ਸਿਨੇਮਾ ਨਜ਼ਦੀਕ ਹਾਈ ਵੋਲਟੇਜ਼ ਕਰੰਟ ਵਾਲੀ ਤਾਰ ਖੇਤ ਵਿੱਚ ਡਿੱਗਣ ਕਾਰਨ ਢਾਈ ਏਕੜ ਦੇ ਕਰੀਬ ਕਣਕ ਦੀ ਫਸਲ ਸੜ ਕੇ ਸੁਆਹ ਹੋ ਗਈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆ ਨਗਰ ਕੌਂਸਲ ਬਰਨਾਲਾ ਦੇ ਪ੍ਰਧਾਨ ਗੁਰਜੀਤ ਸਿੰਘ ਔਲਖ ਰਾਮਨਵਾਸੀਆ ਦੇ ਭਰਾ ਕਿਸਾਨ ਹਾਕਮ ਸਿੰਘ ਰਮਨਵਾਸੀਆ ਨੇ ਦੱਸਿਆ ਕਿ ਉਸ ਨੇ 65 ਹਜ਼ਾਰ ਰੁਪਏ 'ਚ ਪ੍ਰਤੀ ਕਿੱਲਾ ਕੁੱਲ ਚਾਰ ਏਕੜ ਜ਼ਮੀਨ ਠੇਕੇ ਉਪਰ ਲਈ ਸੀ, ਜਿਸ ਵਿੱਚ ਕਣਕ ਬੀਜੀ ਹੋਈ ਸੀ। ਅੱਜ ਬਾਅਦ ਦੁਪਿਹਰ ਖੇਤ ਵਿੱਚੋਂ ਲੰਘਦੀ 11 ਹਜ਼ਾਰ ਹਾਈ ਵੋਲਟੇਜ ਖੰਬੇ ਤੋਂ ਤਾਰ ਡਿੱਗਣ ਕਾਰਨ ਖੇਤ ਵਿੱਚ ਖੜੀ ਕਣਕ ਨੂੰ ਅੱਗ ਲੱਗ ਗਈ। ਇਸ ਦਾ ਪਤਾ ਲੱਗਦਿਆ ਹੀ ਆਸ-ਪਾਸ ਦੇ ਲੋਕ ਟਰੈਕਟਰ ਅਤੇ ਪਾਣੀ ਵਾਲੀਆਂ ਢੋਲੀਆਂ ਦੇ ਨਾਲ ਅੱਗ ਉਪਰ ਕਾਬੂ ਪਾਉਣ ਦੀ ਕੋਸ਼ਿਸ਼ ਕਰਨ ਲੱਗ ਗਏ ਅਤੇ ਨਾਲ ਹੀ ਫਾਇਰ ਬਿ੍ਰਗੇਡ ਨੂੰ ਵੀ ਸੂਚਿਤ ਕੀਤਾ ਗਿਆ ਪਰ ਫਾਇਰ ਬਿ੍ਰਗੇਡ ਦੀ ਗੱਡੀ ਵੀ ਪਾਹੁੰਚ ਗਈ ਪਰ ਮੌਕੇ ਤੇ ਪੁਹੁੰਚੇ ਲੋਕਾਂ ਵੱਲੋਂ ਪਹਿਲਾ ਹੀ ਅੱਗ ਉਪਰ ਕਾਬੂ ਪਾ ਲਿਆ ਗਿਆ। ਕਿਸਾਨ ਹਾਕਮ ਸਿੰਘ ਨੇ ਦੱਸਿਆ ਕਿ ਉਸ ਦੀ ਕਣਕ ਦੀ ਫਸਲ ਨੂੰ ਅੱਗ ਲੱਗਣ ਕਾਰਨ ਡੇਢ ਲੱਖ ਦਾ ਨੁਕਸਾਨ ਹੋਇਆ ਹੈ। ਇਸ ਮੌਕੇ ਕਿਸਾਨ ਸਾਬਕਾ ਸਰਪੰਚ ਦਰਸ਼ਨ ਸਿੰਘ ਡੁੱਲਟ, ਨੰਬਰਦਾਰ ਨਿਰਮਲ ਸਿੰਘ, ਬੀਰ ਸਿੰਘ ਸੂਚ, ਦਵਿੰਦਰ ਸਿੰਘ ਡੁੱਲਟ, ਜੰਗੀਰ ਸਿੰਘ ਸੂਚ, ਗੁਰਮੇਲ ਸਿੰਘ ਡੁੱਲਟ, ਅਜਾਇਬ ਸਿੰਘ ਜਲਾਲ ਕਾ, ਜਰਨੈਲ ਸਿੰਘ, ਨੰਬਰਦਾਰ ਜਗਤਾਰ ਸਿੰਘ, ਹਰਦੁਆਰ ਸਿੰਘ ਔਲਖ, ਗੁਰਸੇਵਕ ਸਿੰਘ ਰਾਮਨਵਾਸੀਆ, ਆਦਿ ਨੇ ਪੰਜਾਬ ਸਰਕਾਰ ਤੋਂ ਮੰਗ ਕੀਤੀ ਕਿ ਅੱਗ ਲੱਗਣ ਕਾਰਨ ਕਿਸਾਨ ਹਾਕਮ ਸਿੰਘ ਦੇ ਹੋਏ ਨੁਕਸਾਨ ਦਾ ਮੁਆਵਜਾ ਦਿੱਤਾ ਜਾਵੇ।