ਤਪਾ ਮੰਡੀ, 4 ਮਈ (ਯਾਦਵਿੰਦਰ ਸਿੰਘ ਤਪਾ) : ਬਰਨਾਲਾ-ਬਠਿੰਡਾ ਨੈਸ਼ਨਲ ਮੁੱਖ ਮਾਰਗ ‘ਤੇ ਸਥਿਤ ਪਿੰਡ ਘੁੰਨਸ ਡਰੇਨ ਦੇ ਖੇਤਾਂ ਵਿੱਚ ਕਣਕ ਦੀ ਟਾਂਗਰ ਨੂੰ ਲੱਗੀ ਅੱਗ ਨਾਲ 30 ਏਕੜ ਦੇ ਕਰੀਬ ਟਾਂਗਰ ਸੜਕੇ ਸੁਆਹ ਹੋ ਗਈ,ਜਿਸ ‘ਚ ਕਿਸਾਨਾਂ ਦਾ ਭਾਰੀ ਨੁਕਸਾਨ ਹੋ ਗਿਆ। ਮੌਕੇ ‘ਤੇ ਹਾਜਰ ਕਿਸਾਨਾਂ ਨੇ ਦੱਸਿਆ ਕਿ ਬਿਜਲੀ ਸ਼ਾਰਟ ਸਰਕਟ ਨਾਲ ਲੱਗੀ ਅੱਗ ਦਾ ਜਦੋਂ ਨੇੜਲੇ ਖੇਤਾਂ ‘ਚ ਕੰਮ ਕਰਦੇ ਕਿਸਾਨਾਂ,ਮਜਦੂਰਾਂ ਨੂੰ ਪਤਾ ਲੱਗਾ ਤਾਂ ਉਨ੍ਹਾਂ ਤਪਾ ਵਿਖੇ ਖੜ੍ਹੀਆਂ ਦੋ ਫਾਇਰ ਬਿਰਗੇਡ ਦੀਆਂ ਗੱਡੀਆਂ ਨੂੰ ਸੂਚਤ ਕੀਤਾ ਉਨ੍ਹਾਂ ਨੇ ਤੁਰੰਤ ਪਹੁੰਚਕੇ ਅੱਗ ‘ਤੇ ਕਾਬੂ ਪਾਇਆ । ਉਥੇ ਨੇੜਲੇ ਖੇਤਾਂ ‘ਚ ਅੱਗ ਤੇ ਕਾਬੂ ਪਾਉਣ ਲਈ ਟਰੈਕਟਰ ਪਾਣੀ ਦੀ ਟੈਂਕੀ ਨਾਲ ਵੀ ਟਾਂਗਰ ਨੂੰ ਲੱਗੀ ਅੱਗ ਬੁਝਾਉਣ ‘ਚ ਸਹਿਯੋਗ ਦਿੱਤਾ ਗਿਆ। ਕਿਸਾਨਾਂ ਨੇ ਦੱਸਿਆ ਕਿ ਉਨ੍ਹਾਂ 1-2 ਦਿਨ ਪਹਿਲਾਂ ਹੀ ਕਣਕ ਦੀ ਵਾਢੀ ਕਰ ਲਈ ਸੀ ਪਰ ਤੂੜੀ ਕੱਢਣੀ ਸੀ ਪਰ ਬਿਜਲੀ ਦੇ ਸ਼ਾਰਟ ਸਰਕਟ ਨਾਲ ਅੱਗ ਦੀ ਭੇਂਟ ਚੜ੍ਹ ਗਈ ਜਿਸ ਨਾਲ ਉਨ੍ਹਾਂ ਦਾ ਲੱਖ ਰੁਪਏ ਦੀ ਤੂੜੀ ਮੱਚਕੇ ਸੁਆਹ ਹੋ ਗਈ। ਹਵਾ ਦਾ ਜਿਆਦਾ ਦਬਾਅ ਹੋਣ ਕਾਰਨ ਫਾਇਰ ਮੈਨਾਂ ਨੂੰ ਅੱਗ ਬੁਝਾਉਣ ‘ਚ ਮੁਸ਼ਕਲਾਂ ਦਾ ਵੀ ਸਾਹਮਣਾ ਕਰਨਾ ਪਿਆ। ਜੇਕਰ ਜਿਆਦਾ ਅੱਗ ਫੈਲ ਜਾਂਦੀ ਤਾਂ ਨੇੜਲੀ ਇੱਕ ਫੈਕਟਰੀ ਦਾ ਵੀ ਨੁਕਸਾਨ ਹੋ ਸਕਦਾ ਸੀ। ਇਸ ਮੌਕੇ ਫਾਇਰ ਬ੍ਰਿਗੇਡ ਦੇ ਕਰਮਚਾਰੀ ਯਾਦਵਿੰਦਰ ਸਿੰਘ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਫਾਇਰ ਬ੍ਰਿਗੇਡ ਦੀਆਂ ਤਪਾ ਅਤੇ ਬਰਨਾਲਾ ਦੀਆਂ ਦੋ ਗੱਡੀਆਂ ਮੌਕੇ ਤੇ ਪਹੁੰਚ ਗਈਆਂ ਸਨ। ਜਿਨਾਂ ਨੇ ਅੱਗ ਤੇ ਕਾਬੂ ਪਾ ਲਿਆ ਹੈ। ਪਰ ਕਈ ਏਕੜ ਕਣਕ ਦੀ ਨਾੜ ਮੱਚ ਕੇ ਸਵਾਹ ਹੋ ਗਈ। ਇਸ ਮੌਕੇ ਫਾਇਰ ਮੈਨ ਯਾਦਵਿੰਦਰ ਸਿੰਘ,ਫਾਇਰਮੈਨ ਬਿਕਰਮ ਸਿੰਘ,ਡੀ.ਓ ਗੁਰਜੰਟ ਸਿੰਘ,ਫਾਇਰਮੈਨ ਗੁਰਮੀਤ ਸਿੰਘ ਅਤੇ ਫਾਇਰਮੈਨ ਲਖਵਿੰਦਰ ਸਿੰਘ ਹਾਜਰ ਸਨ।