ਰਾਹਗੀਰਾਂ ਦੇ ਨਾਲ-ਨਾਲ ਸਵਾਰੀਆਂ ਦੀ ਜਾਨ ਵੀ ਖਤਰੇ ‘ਚ ਪਾਈ
ਲਾਲੜੂ, 6 ਮਈ (ਚੰਦਰਪਾਲ ਅੱਤਰੀ) : ਅੰਬਾਲਾ-ਚੰਡੀਗੜ੍ਹ ਕੌਮੀ ਮਾਰਗ ਉੱਤੇ ਵੱਧ ਰਹੀ ਵਾਹਨਾਂ ਦੀ ਗਿਣਤੀ ਕਾਰਨ ਜਿੱਥੇ ਆਮ ਲੋਕ ਪ੍ਰੇਸ਼ਾਨ ਹਨ, ਉੱਥੇ ਹੀ ਵਾਹਨਾਂ ਦੀਆਂ ਲੰਮੀਆਂ-ਲੰਮੀਆਂ ਲਾਈਨਾਂ ਨੂੰ ਤੋੜ ਕੇ ਸੜਕ ਕਿਨਾਰੇ ਬਣੇ ਡਿਵਾਇਡਰਾਂ ਉੱਤੋਂ ਦੀ ਹਰਿਆਣਾ ਰੋਡਵੇਜ ਦੇ ਡਰਾਇਵਰ ਬੱਸਾਂ ਨੂੰ ਟਪਾਉਂਦੇ ਆਮ ਦੇਖੇ ਜਾਂਦੇ ਹਨ। ਇਸ ਕਾਰਨ ਰਾਹਗੀਰਾਂ ਦੇ ਨਾਲ-ਨਾਲ ਬੱਸ ਅੰਦਰ ਬੈਠੀਆਂ ਸਵਾਰੀਆਂ ਤੱਕ ਨੂੰ ਜਾਨ ਦਾ ਖਤਰਾ ਬਣਿਆ ਰਹਿੰਦਾ ਹੈ।ਇਸੇ ਤਰ੍ਹਾਂ ਦਾ ਵਾਕਿਆ ਅੱਜ ਉਸ ਸਮੇਂ ਵਾਪਰਿਆ ਜਦੋਂ ਲਾਈਨ ‘ਚ ਖੜਨ ਦੀ ਬਜਾਏ ਹਰਿਆਣਾ ਰੋਡਵੇਜ ਦਾ ਡਰਾਇਵਰ ਸੜਕ ਕਿਨਾਰੇ ਬਣੀ ਸਲਿੱਪ ਰੋਡ ਦੇ ਵਿਚਕਾਰ ਡਿਵਾਇਡਰ ਉੱਤੋਂ ਦੀ ਬੱਸ ਲੰਘਾ ਰਿਹਾ ਸੀ ਅਤੇ ਡਿਵਾਇਡਰ ਉੱਤੇ ਰੱਖੀ ਸਲੈਬ ਟੁੱਟ ਜਾਣ ਕਾਰਨ ਬੱਸ ਦਾ ਅਗਲਾ ਟਾਇਰ ਡਿਵਾਇਡਰ ਦੇ ਥੱਲੇ ਬਣੀ ਡਰੇਨ ਵਿੱਚ ਫਸ ਗਿਆ। ਇਸ ਦਾ ਵਿਰੋਧ ਕਰਦਿਆਂ ਲੋਕਾਂ ਨੇ ਦੱਸਿਆ ਕਿ ਇਹ ਹਰਿਆਣਾ ਰੋਡਵੇਜ ਦੀ ਬੱਸ ਅੰਬਾਲਾ ਤੋਂ ਚੰਡੀਗੜ੍ਹ ਜਾ ਰਹੀ ਸੀ ਅਤੇ ਸਥਾਨਕ ਆਈਟੀਆਈ ਲਾਇਟਾਂ ਉੱਤੇ ਕੌਮੀ ਮਾਰਗ ਉੱਤੇ ਲੱਗੀ ਵਾਹਨਾਂ ਦੀ ਲੰਮੀ ਲਾਈਨ ਰਾਹੀ ਲੰਘਣ ਦੀ ਬਜਾਏ ਹਰਿਆਣਾ ਰੋਡਵੇਜ਼ ਦਾ ਡਰਾਈਵਰ ਬੱਸ ਨੂੰ ਡਿਵਾਇਡਰ ਪਾਰ ਕਰਕੇ ਸਲਿੱਪ ਰੋਡ ਰਾਹੀ ਕੱਢਣ ਦੀ ਕੋਸ਼ਿਸ਼ ਕਰਨ ਲੱਗਾ, ਜਿਸ ਦੇ ਚੱਲਦਿਆਂ ਬੱਸ ਦਾ ਅਗਲਾ ਟਾਇਰ ਡਿਵਾਇਡਰ ਦੀ ਸਲੈਬ ਟੁੱਟਣ ਕਾਰਨ ਡਰੇਨ ਵਿੱਚ ਫਸ ਗਿਆ ਅਤੇ ਬੱਸ ਵਿੱਚ ਸਵਾਰ 4 ਸਵਾਰੀਆਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ,ਜਿਨ੍ਹਾਂ ਨੂੰ ਫਸਟਏਡ ਦੇ ਕੇ ਦੂਜੇ ਵਾਹਨ ਰਾਹੀਂ ਚੰਡੀਗੜ੍ਹ ਵੱਲ ਭੇਜ ਦਿੱਤਾ ਗਿਆ। ਰਾਹਗੀਰਾਂ ਦਾ ਕਹਿਣਾ ਹੈ ਕਿ ਬੱਸ ਦਾ ਬੇਤਰਤੀਬ ਸੜਕਾਂ ਉੱਤੇ ਚਲਣਾ ਰਾਹਗੀਰਾਂ ਦੀ ਜਾਨ ਲਈ ਖਤਰਾ ਹੈ, ਜਿਸ ਨੂੰ ਸਥਾਨਕ ਪੁਲਿਸ ਨੂੰ ਰੋਕਣਾ ਚਾਹੀਦਾ ਹੈ। ਸੰਪਰਕ ਕਰਨ ਤੇ ਟਰੈਫਿਕ ਪੁਲਿਸ ਇੰਚਾਰਜ ਲੈਹਲੀ ਜਸਬੀਰ ਸਿੰਘ ਨੇ ਕਿਹਾ ਕਿ ਆਵਾਜਾਈ ਵਿੱਚ ਵਿਘਨ ਪਾਉਣ ਵਾਲਿਆਂ ਨੂੰ ਕਿਸੇ ਵੀ ਕੀਮਤ ਉੱਤੇ ਛੱਡਿਆ ਨਹੀਂ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਬੱਸ ਡਰਾਇਵਰ ਦੀ ਅਣਗਹਿਲੀ ਹੈ, ਜਿਸ ਨੂੰ ਦੇਖਦਿਆਂ ਉਨ੍ਹਾਂ ਵੱਲੋਂ ਚਾਲਕ ਦਾ ਗਲਤ ਡਰਾਈਵਿੰਗ ਦਾ ਚਲਾਨ ਵੀ ਕੱਟਿਆ ਦਿੱਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਰਾਹਗੀਰਾਂ ਦੀ ਸੁਰੱਖਿਆ ਨੂੰ ਦੇਖਦਿਆਂ ਆਵਾਜਾਈ ਨੂੰ ਸੰਚਾਰੂ ਢੰਗ ਨਾਲ ਚਲਾਉਣ ਲਈ ਟਰੈਫਿਕ ਪੁਲਿਸ ਪੂਰੀ ਤਰ੍ਹਾਂ ਵਚਨਬੱਧ ਹੈ।