ਏਜੰਸੀਆਂ
ਨਵੀਂ ਦਿੱਲੀ/23 ਮਈ : 16 ਸਾਲ ਦੀ ਕਾਮਿਆ ਕਾਰਤੀਕੇਅਨ ਨੇਪਾਲ ਵਾਲੇ ਪਾਸਿਓਂ ਮਾਊਂਟ ਐਵਰੈਸਟ ’ਤੇ ਚੜ੍ਹਨ ਵਾਲੀ ਸਭ ਤੋਂ ਛੋਟੀ ਉਮਰ ਦੀ ਭਾਰਤੀ ਲੜਕੀ ਬਣ ਗਈ ਹੈ। ਮੁੰਬਈ ਦੇ ਨੇਵੀ ਚਿਲਡਰਨ ਸਕੂਲ ਦੀ ਵਿਦਿਆਰਥਣ ਕਾਮਿਆ ਕਾਰਤੀਕੇਅਨ ਨੇ 20 ਮਈ ਨੂੰ ਮਾਉਂਟੇਨ ਕਲਾਇੰਬਿੰਗ ਦੇ ਇਤਿਹਾਸ ਵਿੱਚ ਇੱਕ ਵੱਡੀ ਉਪਲਬਧੀ ਹਾਸਲ ਕੀਤੀ ਹੈ। ਕਾਮਿਆ ਨੇ ਭਾਰਤੀ ਜਲ ਫੌਜ ਦੇ ਇੱਕ ਅਧਿਕਾਰੀ ਕਮਾਂਡਰ ਐਸ ਕਾਰਤੀਕੇਅਨ ਦੇ ਨਾਲ ਦੁਨੀਆ ਦੀ ਸਭ ਤੋਂ ਉੱਚੀ ਚੋਟੀ ਮਾਊਂਟ ਐਵਰੈਸਟ ਦੀ ਸਫਲਤਾਪੂਰਵਕ ਚੜ੍ਹਾਈ ਕੀਤੀ। ਇਸ ਨਾਲ ਕਾਮਿਆ ਮਾਊਂਟ ਐਵਰੈਸਟ ਦੀ ਚੋਟੀ ’ਤੇ ਪਹੁੰਚਣ ਵਾਲੀ ਸਭ ਤੋਂ ਘੱਟ ਉਮਰ ਦੀ ਭਾਰਤੀ ਅਤੇ ਦੁਨੀਆ ਦੀ ਦੂਜੀ ਸਭ ਤੋਂ ਘੱਟ ਉਮਰ ਦੀ ਲੜਕੀ ਬਣ ਗਈ ਹੈ। ਕਾਮਿਆ ਹੁਣ ਤੱਕ ਸੱਤ ਮਹਾਂਦੀਪਾਂ ਵਿੱਚੋਂ ਛੇ ਦੀਆਂ ਸਭ ਤੋਂ ਉੱਚੀਆਂ ਚੋਟੀਆਂ ’ਤੇ ਚੜ੍ਹਾਈ ਕਰ ਚੁੱਕੀ ਹੈ। ਪਰਬਤਾਰੋਹੀ ਪ੍ਰਤਿ ਕਾਮਿਆ ਦਾ ਜਨੂੰਨ ਛੋਟੀ ਉਮਰ ਤੋਂ ਹੀ ਸ਼ੁਰੂ ਹੋ ਗਿਆ ਸੀ। ਸਿਰਫ਼ ਨੌਂ ਸਾਲ ਦੀ ਉਮਰ ਵਿੱਚ ਕਾਮਿਆ ਨੇ 2017 ਵਿੱਚ ਭਾਰਤੀ ਹਿਮਾਲਿਆ ਵਿੱਚ 20,180 ਫੁੱਟ ਦੀ ਉਚਾਈ ’ਤੇ ਸਥਿਤ ਚੋਟੀ ਮਾਊਂਟ ਸਟੋਕ ਕਾਂਗਰੀ ’ਤੇ ਚੜ੍ਹ ਕੇ ਆਪਣੀ ਪਰਬਤਾਰੋਹੀ ਯਾਤਰਾ ਦੀ ਸ਼ੁਰੂਆਤ ਕੀਤੀ।
ਇਸ ਤੋਂ ਇਲਾਵਾ 2016 ਵਿਚ ਕਾਮਿਆ ਨੇ ਹਰ-ਕੀ-ਦੂਨ (13,500 ਫੁੱਟ), ਕੇਦਾਰਨਾਥ ਪੀਕ (13,500 ਫੁੱਟ) ਅਤੇ ਰੂਪਕੁੰਡ ਝੀਲ (16,400 ਫੁੱਟ) ’ਤੇ ਚੜ੍ਹਾਈ ਕੀਤੀ, ਜਿਸ ਨਾਲ ਪਹਾੜਾਂ ਪ੍ਰਤਿ ਉਸ ਦਾ ਇਰਾਦਾ ਅਤੇ ਪਿਆਰ ਹੋਰ ਵੱਧਦਾ ਗਿਆ। ਇਨ੍ਹਾਂ ਸ਼ੁਰੂਆਤੀ ਤਜ਼ਰਬਿਆਂ ਨੇ ਅੱਜ ਕਾਮਿਆ ਦੀਆਂ ਭਵਿੱਖ ਦੀਆਂ ਪ੍ਰਾਪਤੀਆਂ ਦੀ ਨੀਂਹ ਰੱਖੀ।
ਕਾਮਿਆ ਨੇ ਇਸ ਤੋਂ ਪਹਿਲਾਂ ਨੇਪਾਲ ਵਿਚ ਐਵਰੈਸਟ ਬੇਸ ਕੈਂਪ ਦੀ ਯਾਤਰਾ ਕੀਤੀ ਸੀ, ਜੋ ਕਿ 17,600 ਫੁੱਟ ਦੀ ਉਚਾਈ ’ਤੇ ਸਥਿਤ ਹੈ। ਇਸ ਪ੍ਰਾਪਤੀ ਨਾਲ ਉਹ ਬੇਸ ਕੈਂਪ ਤੱਕ ਪਹੁੰਚਣ ਵਾਲੀ ਦੂਜੀ ਸਭ ਤੋਂ ਛੋਟੀ ਕੁੜੀ ਬਣ ਗਈ ਸੀ।