ਪੀ.ਪੀ. ਵਰਮਾਪੰਚਕੂਲਾ, 28 ਸਤੰਬਰ
ਪੰਚਕੂਲਾ ਦੇ ਮੋਰਨੀ ਇਲਾਕੇ ਦੇ ਪਿੰਡ ਭੂੜ ਵਿੱਚ ਅੱਜ ਤੇਂਦੂਏ ਨੇ ਦੋ ਬਕਰੀਆਂ ਤੇ ਹਮਲਾ ਕਰਕੇ ਮਾਰ ਦਿੱਤਾ। ਇਸ ਕਾਰਨ ਪਿੰਡ ਦੇ ਲੋਕਾਂ ਵਿੱਚ ਦਹਿਸ਼ਤ ਬਣੀ ਹੋਈ ਹੈ। ਲੋਕਾਂ ਦਾ ਕਹਿਣਾ ਹੈ ਕੀ ਮਾਦਾ ਤੇਂਦੂਆ ਕਈ ਦਿਨਾਂ ਤੋਂ ਇਸ ਇਲਾਕੇ ਵਿੱਚ ਆਪਣੇ ਬੱਚਿਆਂ ਨਾਲ ਘੁੰਮ ਰਹੀ ਹੈ। ਇਲਾਕੇ ਦੇ ਜੋ ਬੱਚੇ ਰੋਜਾਨਾ ਸਕੂਲ ਜਾਂਦੇ ਹਨ ਉਹਨਾਂ ਦੇ ਮਾਪਿਆਂ ਵਿੱਚ ਇਸ ਗੱਲ ਦਾ ਡਰ ਫੈਲਿਆ ਹੋਇਆ ਹੈ। ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਪਹਿਲੇ ਵੀ ਹੋ ਚੁੱਕੀਆਂ ਹਨ। ਪਿੰਡ ਵਾਲਿਆਂ ਦਾ ਕਹਿਣਾ ਹੈ ਕੀ ਅੱਜ ਤੇਂਦੂਏ ਨੇ ਬਕਰੀਆਂ ਤੇ ਦਿਨ ਦਿਹਾੜੇ ਹਮਲਾ ਕੀਤਾ ਹੈ ਤੇ ਪਿੰਡ ਦੇ ਲੋਕ ਕਈ ਵਾਰੀ ਤੇਦੂਏ ਨੂੰ ਦੇਖ ਵੀ ਚੁੱਕੇ ਹਨ। ਪਿੰਡ ਦੇ ਲੋਕਾਂ ਨੇ ਪ੍ਰਸ਼ਾਸਨ ਤੇ ਜੰਗਲਾਤ ਵਿਭਾਗ ਤੋਂ ਮੰਗ ਕੀਤੀ ਹੈ ਕਿ ਉਹਨਾਂ ਦੀ ਸਮੱਸਿਆ ਦਾ ਹੱਲ ਕੀਤਾ ਜਾਵੇ ਤਾਂ ਕਿ ਇਲਾਕੇ ਦੇ ਲੋਕਾਂ ਵਿੱਚ ਦਹਿਸ਼ਤ ਖਤਮ ਹੋ ਸਕੇ। ਇਥੇ ਵਰਨਣਯੋਗ ਹੈ ਕੀ ਮੋਰਨੀ ਇਲਾਕੇ ਵਿੱਚ ਇੱਕ ਸਰਵੇ ਦੌਰਾਨ 18 ਤੋਂ ਵੱਧ ਤੇਦੂਏ ਦੱਸੇ ਗਏ ਸਨ।