ਸ੍ਰੀ ਫ਼ਤਹਿਗੜ੍ਹ ਸਾਹਿਬ/3 ਦਸੰਬਰ:
(ਰਵਿੰਦਰ ਸਿੰਘ ਢੀਂਡਸਾ)
ਯੂਨੀਵਰਸਿਟੀ ਕਾਲਜ ਚੁੰਨੀ ਕਲਾਂ ਵਿਖੇ ਆਈ. ਕਿਊ . ਏ.ਸੀ.ਸੈੱਲ ਵੱਲੋਂ ਅਧਿਆਪਕਾਂ ਲਈ 'ਮੈਨੇਜਿੰਗ ਇਮੋਸ਼ਨਸ ਫਾਰ ਇਫੈਕਟਿਵ ਟੀਚਿੰਗ' ਵਿਸ਼ੇ 'ਤੇ ਇੱਕ ਰੋਜ਼ਾ ਵਰਕਸ਼ਾਪ ਕਰਵਾਈ ਗਈ ਜਿਸ ਦੇ ਮੁੱਖ ਬੁਲਾਰੇ ਇਮੋਸ਼ਨਲ ਇੰਟੈਲੀਜੈਂਸ ਟਰੇਨਰ ਕਮਾਂਡਰ ਜਗਮੋਹਨ ਭੋਗਲ ਸਨ। ਪ੍ਰੋਗਰਾਮ ਦੀ ਰਸਮੀ ਸ਼ੁਰੂਆਤ ਕਰਦਿਆਂ ਕਾਲਜ ਦੀ ਪ੍ਰਿੰਸੀਪਲ ਡਾ. ਵਨੀਤਾ ਗਰਗ ਨੇ ਮੁੱਖ ਬੁਲਾਰੇ ਨੂੰ ਜੀ ਆਇਆ ਆਖਿਆ ਤੇ ਆਪਣੇ ਸਟਾਫ ਤੋਂ ਜਾਣੂ ਕਰਵਾਇਆ। ਪ੍ਰੋਗਰਾਮ ਦੇ ਕੋਆਰਡੀਨੇਟਰ ਕਾਮਰਸ ਵਿਭਾਗ ਦੇ ਅਸਿਸਟੈਂਟ ਪ੍ਰੋਫੈਸਰ ਡਾ. ਨਵਜੋਤ ਕੌਰ ਨੇ ਕਮਾਂਡਰ ਜਗਮੋਹਨ ਭੋਗਲ ਦੀਆਂ ਇਮੋਸ਼ਨਲ ਇੰਟੈਲੀਜਸ ਟਰੇਨਰ ਦੇ ਤੌਰ ਤੇ ਪ੍ਰਾਪਤੀਆਂ ਅਤੇ ਤਜਰਬਿਆਂ ਬਾਰੇ ਦੱਸਿਆ ।ਇਸ ਤੋਂ ਬਾਅਦ ਜਗਮੋਹਨ ਭੋਗਲ ਨੇ ਸਲਾਈਡਾਂ ਦੇ ਰਾਹੀਂ ਇਮੋਸ਼ਨਲ ਇੰਟੈਲੀਜਸ ਵਿਸ਼ੇ ਬਾਰੇ ਵਿਸਥਾਰ ਪੂਰਵਕ ਜਾਣਕਾਰੀ ਦਿੱਤੀ।ਉਹਨਾਂ ਦੱਸਿਆ ਕਿ ਕਿਵੇਂ ਅਸੀਂ ਨਿਤ ਦਿਨ ਇੱਕ ਨਕਾਰਾਤਮਕ ਸੋਚ ਨੂੰ ਲੈ ਕੇ ਚੱਲ ਰਹੇ ਹਾਂ ਜਿਸ ਦੇ ਨਾਲ ਸਾਡਾ ਆਲਾ ਦੁਆਲਾ ਤਾਂ ਮਲੀਨ ਹੁੰਦਾ ਹੀ ਹੈ ਨਾਲ ਹੀ ਇਸ ਦਾ ਅਸਰ ਸਾਡੀ ਸਿਹਤ, ਸਾਡੇ ਪਰਿਵਾਰ ,ਬੱਚਿਆਂ ਅਤੇ ਸਾਡੇ ਆਲੇ ਦੁਆਲੇ ਤੇ ਵੀ ਪੈਂਦਾ ਹੈ।ਅਧਿਆਪਕਾਂ ਵੱਲੋਂ ਵੱਖ-ਵੱਖ ਤਰ੍ਹਾਂ ਦੀਆਂ ਸਰੀਰਕ ਅਤੇ ਮਾਨਸਿਕ ਅਭਿਆਸਾਂ ਦੇ ਰਾਹੀਂ ਪੌਜਿਟਿਵ ਐਨਰਜੀ ਨੂੰ ਕਿਵੇਂ ਖਿੱਚਿਆ ਜਾ ਸਕਦਾ ਹੈ ,ਬਾਰੇ ਵੀ ਉਨ੍ਹਾਂ ਦੱਸਿਆ। ਉਹਨਾਂ ਨੇ ਵੱਖ ਵੱਖ ਸਰਵੇਖਣਾਂ ਦੇ ਹਵਾਲੇ ਦਿੰਦੇ ਹੋਏ ਦੱਸਿਆ ਕਿ ਨੌਜਵਾਨ ਵਿਦਿਆਰਥੀਆਂ ਦਾ 81% ਹਿੱਸਾ ਡਿਪਰੈਸ਼ਨ ਵਿੱਚ ਹੈ ਜੋ ਕਿ ਆਤਮ ਹੱਤਿਆ ਵੱਲ ਵਧ ਰਿਹਾ ਹੈ ਤੇ ਕਿੱਦਾਂ ਅਸੀਂ ਬੱਚਿਆਂ ਦੇ ਉੱਪਰ ਭਵਿੱਖ ਦਾ ਬੋਝ ਪਾ ਕੇ ਉਹਨਾਂ ਉੱਪਰ ਦਬਾਅ ਨੂੰ ਵਧਾ ਰਹੇ ਹਾਂ ਜਿਸ ਲਈ ਸੋਸ਼ਲ ਮੀਡੀਆ ਵੀ ਬਰਾਬਰ ਜਿੰਮੇਵਾਰ ਹੈ।ਇੱਕ ਅਧਿਆਪਕ ਅਤੇ ਇੱਕ ਮਾਪੇ ਹੋਣ ਦੇ ਤੌਰ ਤੇ ਸਾਡੀ ਇਹ ਜਿੰਮੇਵਾਰੀ ਬਣਦੀ ਹੈ ਕਿ ਅਸੀਂ ਬੱਚਿਆਂ ਦੀਆਂ ਭਾਵਨਾਵਾਂ ਨੂੰ ਸਮਝ ਕੇ ਸਹੀ ਤਰੀਕੇ ਨਾਲ ਉਹਨਾਂ ਦਾ ਪਾਲਣ ਪੋਸ਼ਣ ਕਰੀਏ ਤੇ ਉਹਨਾਂ ਦੀ ਰਹਨੁਮਾਈ ਕਰੀਏ ,ਚਾਹੇ ਉਹ ਸਾਡੇ ਖੁਦ ਦੇ ਬੱਚੇ ਹੋਣ ਚਾਹੇ ਉਹ ਸਾਡੇ ਵਿਦਿਆਰਥੀ ਹੋਣ। ਸੈਮੀਨਾਰ ਉਪਰੰਤ ਉਹਨਾਂ ਨੇ ਅਧਿਆਪਕਾਂ ਦੇ ਨਾਲ ਸਵਾਲ ਜਵਾਬ ਵਿਧੀ ਰਾਹੀਂ ਵੀ ਤਜਰਬੇ ਸਾਂਝੇ ਕੀਤੇ। ਇਸ ਮੌਕੇ ਪ੍ਰੋਗਰਾਮ ਦੇ ਕੋ ਕੋਆਰਡੀਨੇਟਰ ਡਾ.ਜਤਿੰਦਰ ਸਿੰਘ ਅਤੇ ਡਾ. ਜਸਪ੍ਰੀਤ ਕੌਰ ਨੇ ਵੀ ਆਪਣੇ ਵਿਚਾਰ ਸਾਂਝੇ ਕੀਤੇ ।ਸਟਾਫ ਦੇ ਉੱਪਰ ਇਸ ਸੈਮੀਨਾਰ ਦਾ ਬਹੁਤ ਹੀ ਸਕਾਰਾਤਮਕ ਪ੍ਰਭਾਵ ਪਿਆ। ਡਾ. ਜਸਪ੍ਰੀਤ ਕੌਰ ਨੇ ਆਏ ਮਹਿਮਾਨਾਂ ਦਾ ਧੰਨਵਾਦ ਕੀਤਾ।