ਵਿਸ਼ਵ ਸਾਈਕਲ ਦਿਵਸ ਮੌਕੇ ਮੇਅਰ ਅਨੂਪ ਗੁਪਤਾ ਨੇ ਅੱਧੇ ਸ਼ਹਿਰ ਦੀ ਸਾਈਕਲ ਯਾਤਰਾ ਕੀਤੀ

3 ਜੂਨ:

ਵਿਸ਼ਵ ਸਾਈਕਲ ਦਿਵਸ ਮੌਕੇ ਸ਼ਨੀਵਾਰ ਨੂੰ ਨਗਰ ਨਿਗਮ ਅਤੇ ਚੰਡੀਗੜ੍ਹ ਸਮਾਰਟ ਸਿਟੀ ਵੱਲੋਂ ਸਾਈਕਲ ਰੈਲੀ ਕੱਢੀ ਗਈ। ਇਸ ਵਿੱਚ ਮੇਅਰ ਅਨੂਪ ਗੁਪਤਾ, ਨਗਰ ਨਿਗਮ ਕਮਿਸ਼ਨਰ ਅਨਿੰਦਿਤਾ ਮਿੱਤਰਾ ਅਤੇ ਨਗਰ ਨਿਗਮ ਦੇ ਕਈ ਕਰਮਚਾਰੀ ਮੌਜੂਦ ਸਨ। ਸਾਰਿਆਂ ਨੇ ਸੈਕਟਰ-42 ਦੇ ਕਮਿਊਨਿਟੀ ਸੈਂਟਰ ਤੋਂ ਸਾਈਕਲਿੰਗ ਸ਼ੁਰੂ ਕੀਤੀ ਅਤੇ ਲਗਭਗ ਅੱਧਾ ਸ਼ਹਿਰ ਕਵਰ ਕੀਤਾ।

ਮੇਅਰ ਨੇ ਕਿਹਾ ਕਿ ਹਰ ਵਿਅਕਤੀ ਨੂੰ ਸਿਹਤਮੰਦ ਰਹਿਣ ਲਈ ਸਾਈਕਲ ਦੀ ਸਵਾਰੀ ਕਰਨੀ ਚਾਹੀਦੀ ਹੈ। ਚੰਡੀਗੜ੍ਹ ਵਿੱਚ ਸਾਈਕਲ ਟ੍ਰੈਕ ਮੌਜੂਦ ਹਨ, ਇਸ ਲਈ ਲੋਕ ਮੁੱਖ ਸੜਕ 'ਤੇ ਉਤਰੇ ਬਿਨਾਂ ਆਪਣੀ ਮੰਜ਼ਿਲ ਤੱਕ ਸਾਈਕਲ ਚਲਾ ਸਕਦੇ ਹਨ। ਸ਼ਹਿਰ ਵਿੱਚ ਸਾਈਕਲਿੰਗ ਨੂੰ ਸੁਰੱਖਿਅਤ ਬਣਾਉਣ ਦੇ ਉਦੇਸ਼ ਨਾਲ ਮੇਅਰ ਨੇ ਇੱਕ ਦਿਨ ਪਹਿਲਾਂ ‘ਚਿਪਕਾਰ’ ਮੁਹਿੰਮ ਦੀ ਸ਼ੁਰੂਆਤ ਕੀਤੀ ਹੈ। ਇਹ ਰਿਫਲੈਕਟਿਵ ਸਟਿੱਕਰ ਹਨੇਰੇ ਵਿੱਚ ਆਉਣ ਵਾਲੇ ਸਾਈਕਲ ਸਵਾਰਾਂ ਲਈ ਬਹੁਤ ਲਾਭਦਾਇਕ ਹਨ ਕਿਉਂਕਿ ਸਾਈਕਲਾਂ ਉੱਤੇ ਲੱਗੇ ਇਹ ਸਟਿੱਕਰ ਵਾਹਨ ਚਾਲਕਾਂ ਨੂੰ ਦੂਰੋਂ ਹੀ ਦਿਖਾਈ ਦਿੰਦੇ ਹਨ। ਇਸ ਨਾਲ ਹਾਦਸਿਆਂ ਵਿੱਚ ਕਮੀ ਆਉਂਦੀ ਹੈ।

ਮੇਅਰ ਅਨੂਪ ਗੁਪਤਾ ਨੇ ਕਿਹਾ ਕਿ ਇਸ ਮੁਹਿੰਮ ਨਾਲ ਸਾਈਕਲ ਚਲਾਉਣ ਵਾਲੇ ਸਾਡੇ ਮਜ਼ਦੂਰ ਸੜਕ 'ਤੇ ਵਧੇਰੇ ਸੁਰੱਖਿਅਤ ਹੋਣਗੇ। ਦੱਸ ਦੇਈਏ ਕਿ ਨਗਰ ਨਿਗਮ ਵੱਲੋਂ ‘ਮਾਈ ਲਾਈਫ ਮਾਈ ਬਿਊਟੀਫੁੱਲ ਸਿਟੀ’ ਮੁਹਿੰਮ ਵੀ ਚਲਾਈ ਜਾ ਰਹੀ ਹੈ। ਇਸ ਤਹਿਤ ਲੋਕ 5 ਜੂਨ ਤੱਕ ਸ਼ਹਿਰ ਦੇ ਆਰ.ਆਰ.ਆਰ ਸਟੋਰਾਂ 'ਤੇ ਘਰੇਲੂ ਸਮਾਨ ਦਾਨ ਕਰ ਸਕਦੇ ਹਨ। ਸ਼ਹਿਰ ਦੇ ਹਰੇਕ ਵਾਰਡ ਵਿੱਚ ਕਮਿਊਨਿਟੀ ਸੈਂਟਰਾਂ, ਸਹਿਜ ਸਫ਼ਾਈ ਕੇਂਦਰਾਂ, ਚੈਰੀਟੇਬਲ ਸੰਸਥਾਵਾਂ, ਧਾਰਮਿਕ ਸਥਾਨਾਂ ਜਾਂ ਮਾਰਕੀਟ ਵੈਲਫੇਅਰ ਐਸੋਸੀਏਸ਼ਨਾਂ (MWA) ਦੀਆਂ ਦੁਕਾਨਾਂ 'ਤੇ 34 RRR ਕੇਂਦਰ ਸਥਾਪਤ ਕੀਤੇ ਗਏ ਹਨ। ਜਿੱਥੇ ਲੋਕ ਦਾਨ ਕਰ ਸਕਦੇ ਹਨ।