ਸ੍ਰੀ ਫ਼ਤਹਿਗੜ੍ਹ ਸਾਹਿਬ/ 1 ਅਪ੍ਰੈਲ:
(ਰਵਿੰਦਰ ਸਿੰਘ ਢੀਂਡਸਾ)
ਦੇਸ਼ ਭਗਤ ਯੂਨੀਵਰਸਿਟੀ ਵਿੱਚ ਬੀ.ਲਿਬ ਦੂਜੇ ਸਮੈਸਟਰ ਦੇ ਵਿਦਿਆਰਥੀ ਤਰੁਣ ਸ਼ਰਮਾ ਨੇ 29 ਤੋਂ 31 ਮਾਰਚ 2024 ਤੱਕ ਅਮਰੀਕਾ ਦੇ ਲਾਸ ਵੇਗਾਸ ਵਿਖੇ ਹੋਈ ਵੱਕਾਰੀ ਉੱਤਰੀ ਅਮਰੀਕਾ ਕਰਾਟੇ ਚੈਂਪੀਅਨਸ਼ਿਪ ਵਿੱਚ ਗੋਲਡ ਮੈਡਲ ਹਾਸਲ ਕੀਤਾ ਹੈ।ਯੂਨੀਵਰਸਟੀ ਦੇ ਬੁਲਾਰੇ ਨੇ ਦੱਸਿਆ ਕਿ ਇਹ ਪ੍ਰਾਪਤੀ ਕਰਾਟੇ ਦੇ ਖੇਤਰ ਵਿੱਚ ਤਰੁਣ ਸ਼ਰਮਾ ਦੇ ਨਿਰੰਤਰ ਸਮਰਪਣ ਅਤੇ ਬੇਮਿਸਾਲ ਹੁਨਰ ਦੀ ਗਵਾਹੀ ਭਰਦੀ ਹੈ।ਉਨਾਂ ਦੱਸਿਆ ਕਿ ਤਰੁਣ ਸ਼ਰਮਾ ਦੀ ਸਫਲਤਾ ਦਾ ਸਫਰ ਪ੍ਰੇਰਨਾਦਾਇਕ ਹੈ ਤੇ ਇਸੇ ਸਾਲ ਦੇ ਸ਼ੁਰੂ ਵਿੱਚ, ਉਸਨੇ ਤਾਲਕਟੋਰਾ ਇਨਡੋਰ ਸਟੇਡੀਅਮ, ਨਵੀਂ ਦਿੱਲੀ ਵਿਖੇ ਆਯੋਜਿਤ ਆਲ ਇੰਡੀਆ ਪੈਰਾ ਕਰਾਟੇ ਚੈਂਪੀਅਨਸ਼ਿਪ ਵਿੱਚ ਗੋਲਡ ਮੈਡਲ ਜਿੱਤਿਆ ਸੀ ਜਿਸ ਤੋਂ ਬਾਅਦ ਤਰੁਣ ਨੇ 21 ਤੋਂ 23 ਜੁਲਾਈ 2023 ਤੱਕ ਮਲੇਸ਼ੀਆ ਦੇ ਮੇਲਾਕਾ ਵਿਖੇ ਹੋਈ ਏਸ਼ੀਅਨ ਪੈਰਾ ਕਰਾਟੇ ਚੈਂਪੀਅਨਸ਼ਿਪ ਵਿੱਚ ਕਾਂਸੀ ਦਾ ਤਗਮਾ ਜਿੱਤ ਕੇ ਆਪਣੀ ਤਾਕਤ ਦਾ ਪ੍ਰਦਰਸ਼ਨ ਕੀਤਾ।ਦੇਸ਼ ਭਗਤ ਯੂਨੀਵਰਸਿਟੀ ਦੇ ਚਾਂਸਲਰ ਡਾ: ਜ਼ੋਰਾ ਸਿੰਘ, ਪ੍ਰੋ-ਚਾਂਸਲਰ ਡਾ: ਤਜਿੰਦਰ ਕੌਰ ਨੇ ਲਿਬ ਐਂਡ ਇਨਫਰਮੇਸ਼ਨ ਸਾਇੰਸਜ਼ ਦੇ ਡਾਇਰੈਕਟਰ ਡਾ: ਪਿਆਰਾ ਲਾਲ, ਖੇਡਾਂ ਦੇ ਨਿਰਦੇਸ਼ਕ ਡਾ: ਪ੍ਰਵੀਨ ਕੁਮਾਰ ਸਮੇਤ ਸਮੁੱਚੀ ਖੇਡ ਕਮੇਟੀ ਅਤੇ ਦੇਸ਼ ਭਗਤ ਪਰਿਵਾਰ ਨੂੰ ਤਰੁਣ ਸ਼ਰਮਾ ਦੀ ਪ੍ਰਾਪਤੀ ਤੇ ਵਧਾਈ ਦਿੱਤੀ ਤੇ ਤਰੁਣ ਸ਼ਰਮਾ ਨੂੰ ਉਸ ਦੇ ਸ਼ਾਨਦਾਰ ਭਵਿੱਖ ਲਈ ਸ਼ੁਭਕਾਮਨਾਵਾਂ ਦਿੱਤੀਆਂ।ਚਾਂਸਲਰ ਡਾ. ਜ਼ੋਰਾ ਸਿੰਘ ਨੇ ਕਿਹਾ ਕਿ ਤਰੁਣ ਸ਼ਰਮਾ ਦੀ ਸਖ਼ਤ ਮਿਹਨਤ ਤੇ ਪ੍ਰਾਪਤੀ ਨੌਜਵਾਨੀ ਲਈ ਪ੍ਰੇਰਨਾ ਹੈ।