ਗਿੱਦੜਬਾਹਾ, 11 ਅਪ੍ਰੈਲ (ਸੁਰਿੰਦਰ ਸਿੰਘ ਚੱਠਾ) : ਗਿੱਦੜਬਾਹਾ ਦੀ ਜਾਮਾ ਮਸਜਿਦ ਵਿਖੇ ਅੱਜ ਈਦ-ਉੱਲ-ਫਿੱਤਰ ਬਹੁਤ ਹੀ ਸ਼ਰਧਾ ਅਤੇ ਉਤਸਾਹ ਨਾਲ ਮਨਾਈ ਗਈ। ਇਸ ਮੌਕੇ ਮਾਰਕੀਟ ਕਮੇਟੀ ਗਿੱਦੜਬਾਹਾ ਦੇ ਮੰਡੀ ਸੁਪਰਵਾਈਜ਼ਰ ਬਲਜੀਤ ਸਿੰਘ ਨੂੰ ਪਹਿਲੇ ਦਰਜੇ ਵਿਚ ਐੱਮ.ਏ. ਉਰਦੂ ਦੀ ਪ੍ਰੀਖਿਆ ਪਾਸ ਕਰਨ ਤੇ ਜਾਮਾ ਮਸ਼ਜਿਦ ਦੇ ਮੌਲਵੀ ਸ਼ਮਸ਼ੂਦੀਨ ਅਤੇ ਕਮੇਟੀ ਅਹੁਦੇਦਾਰਾਂ ਵੱਲੋਂ ਉਚੇਚੇ ਤੌਰ ਤੇ ਸਨਮਾਨਿਤ ਕੀਤਾ ਗਿਆ। ਵਰਣਨਯੋਗ ਹੈ ਕਿ ਬਲਜੀਤ ਸਿੰਘ ਨੇ ਉਕਤ ਮਸਜਿਦ ਵਿਖੇ ਚੱਲਦੇ ਦਾਰੂਲ ਉਲਮ ਨੂਰ-ਏ-ਹੀਰਾ ਮਦਰੱਸੇ ਵਿਚ ਹੀ ਉਰਦੂ ਭਾਸ਼ਾ ਦੀ ਤਾਲੀਮ ਹਾਸਲ ਕੀਤੀ ਸੀ, ਜਿਸ ਦੇ ਸਦਕਾ ਉਹ ਉਕਤ ਡਿਗਰੀ ਹਾਸਲ ਕਰਨ ਵਿਚ ਸਫਲ ਰਹੇ ਹਨ। ਇਸ ਮੌਕੇ ਬਲਜੀਤ ਸਿੰਘ ਨੇ ਜਾਮਾ ਮਸਜਿਦ ਕਮੇਟੀ ਨੂੰ ਉਕਤ ਸਨਮਾਨ ਲਈ ਧੰਨਵਾਦ ਕੀਤਾ। ਇਸ ਮੌਕੇ ਪ੍ਰਧਾਨ ਸਲੀਮ ਖਾਨ ਬਿੱਟੂ, ਮੀਤ ਪ੍ਰਧਾਨ ਮੁਨੀਰ ਮਲਿਕ, ਸਲੀਮ ਮਲਿਕ, ਜੋਸ਼ ਮੁਹੰਮਦ, ਸੋਹਣ ਸਿੰਘ, ਬਲਜੀਤ ਸਿੰਘ, ਮੌਲਵੀ ਉਵੇਸ਼ ਵੀ ਮੌਜੂਦ ਸਨ।