ਬਟਾਲਾ, 20 ਅਪ੍ਰੈਲ (ਬੀ.ਐਸ.ਬਾਜਵਾ)
19 ਮਹੱਤਾਂ (ਕਿੰਨਰਾਂ) ਦੇ ਦੋ ਧੜਿਆਂ ਵਿੱਚ ਇਲਾਕੇ ਦੀ ਵੰਡ ਅਤੇ ਵਧਾਈ ਲੈਣ ਨੂੰ ਲੈ ਕੇ ਖੂਨੀ ਟਕਰਾਅ ਹੋ ਗਿਆ, ਜਿਸ ਵਿੱਚ ਦੋਵਾਂ ਧੜਿਆਂ ਦੇ ਕੁੱਲ 7 ਵਿਅਕਤੀ ਜਖਮੀ ਹੋ ਗਏ। ਇਨ੍ਹਾਂ ਵਿੱਚੋਂ ਦੋ ਦੀ ਹਾਲਤ ਨਾਜੁਕ ਦੱਸੀ ਜਾ ਰਹੀ ਹੈ। ਜਖਮੀਆਂ ਵਿੱਚ ਮਹੰਤ ਅਨਾਮਿਕਾ ਬਾਜਵਾ, ਮਹੰਤ ਦਿਵਿਆ, ਮਹੰਤ ਨੰਦਨੀ, ਮਹੰਤ ਮੰਜੀਰੀ ਅਤੇ ਉਨ੍ਹਾਂ ਦੇ ਸਾਥੀ ਲੱਕੀ, ਜੈਚੰਦ ਸੇਰਾ, ਵਿਲਸਨ ਵਾਸੀ ਨਬੀਮਪੁਰ ਕਲੋਨੀ ਸਾਮਲ ਹਨ, ਜਦਕਿ ਦੂਜੇ ਧੜੇ ਵਿੱਚ ਸੋਨੂੰ ਪੁੱਤਰ ਚਰਨ ਸਿੰਘ ਅਤੇ ਉਸ ਦਾ ਪੁੱਤਰ ਸਾਜਨ ਵਾਸੀ ਜੌੜਾ ਛਤਰਾਂ ਸਾਮਲ ਹਨ। ਸਾਰੇ ਸਿਵਲ ਹਸਪਤਾਲ ਗੁਰਦਾਸਪੁਰ ਵਿਖੇ ਜੇਰੇ ਇਲਾਜ ਹਨ। ਇਨ੍ਹਾਂ ਵਿੱਚੋਂ ਸੋਨੂੰ ਅਤੇ ਜੈਚੰਦ ਸੇਰਾ ਦੀ ਹਾਲਤ ਨਾਜੁਕ ਬਣੀ ਹੋਈ ਹੈ। ਮਹੰਤ (ਕਿੰਨਰ )ਅਨਾਮਿਕਾ ਬਾਜਵਾ ਨੇ ਦੱਸਿਆ ਕਿ ਉਹ ਰਾਜੀ ਮਹੰਤ ਪਠਾਨਕੋਟ ਦੀ ਅਗਵਾਈ ਵਿੱਚ ਗੁਰਦਾਸਪੁਰ ਦੇ ਇਲਾਕਿਆਂ ਵਿੱਚ ਵਧਾਈਆਂ ਮੰਗਦੇ ਹਨ। ਕੁਝ ਦਿਨ ਪਹਿਲਾਂ ਵੀ ਪਿੰਡ ਤੁੰਗ ਵਿੱਚ ਵਧਾਈਆਂ ਮੰਗਣ ਨੂੰ ਲੈ ਕੇ ਗੰਜੀ ਗਰੁੱਪ ਦੇ ਮਹੰਤ ਨਾਲ ਝਗੜਾ ਹੋ ਗਿਆ ਸੀ, ਜਿਸ ਦੀ ਸ਼ਿਕਾਇਤ ਜੌੜਾ ਚੌਂਕੀ ਵਿੱਚ ਦਿੱਤੀ ਗਈ ਹੈ। ਪੁਲਿਸ ਅਤੇ ਪਤਵੰਤਿਆਂ ਨੇ ਰਾਜੀਨਾਮਾ ਕਰਾਉਣ ਲਈ 30 ਅਪ੍ਰੈਲ ਤੱਕ ਦਾ ਸਮਾਂ ਦਿੱਤਾ ਸੀ ਅਤੇ ਸੋਨੂੰ ਨੂੰ ਉਦੋਂ ਤੱਕ ਕਿਤੇ ਵੀ ਵਧਾਈ ਨਾ ਲੈਣ ਲਈ ਕਿਹਾ ਸੀ। ਅਸੀਂ ਵਿਆਹ ਦੀ ਵਧਾਈ ਲੈਣ ਲਈ ਪਿੰਡ ਭੋਪਰ ਦੇ ਇੱਕ ਘਰ ਗਏ ਸੀ ਪਰ ਪਰਿਵਾਰਕ ਮੈਂਬਰਾਂ ਨੇ ਸਾਨੂੰ ਕੁਝ ਦਿਨ ਰੁਕਣ ਲਈ ਕਿਹਾ, ਕਿਉਂਕਿ ਉਹਨਾਂ ਨੇ ਜਠੇਰਿਆਂ ਤੇ ਜਾਣਾ ਸੀ, ਜਿਸ ਕਾਰਨ ਅਸੀਂ ਉਥੋਂ ਵਾਪਸ ਆ ਗਏ। ਕੁਝ ਸਮੇਂ ਬਾਅਦ ਉਕਤ ਪਰਿਵਾਰ ਦਾ ਫੋਨ ਆਇਆ ਕਿ ਹੋਰ ਗਰੁੱਪਾਂ ਦੇ ਕਿੰਨਰ ਵੀ ਵਧਾਈਆਂ ਲੈਣ ਆਏ ਹਨ। ਜਦੋਂ ਅਸੀਂ ਦੂਜੇ ਧੜੇ ਨਾਲ ਗੱਲ ਕਰਨ ਲਈ ਉਥੇ ਪਹੁੰਚੇ ਤਾਂ ਸੋਨੂੰ ਅਤੇ ਉਸ ਦੇ ਲੜਕੇ ਸਾਜਨ ਸਮੇਤ ਦੋ ਗੱਡੀਆਂ 'ਚ ਆਏ ਲੋਕਾਂ ਨੇ ਉਨ੍ਹਾਂ 'ਤੇ ਹਮਲਾ ਕਰ ਦਿੱਤਾ। ਮਹੰਤਾਂ ਨੂੰ ਬਚਾਉਣ ਲਈ ਅੱਗੇ ਆਏ ਜੈਚੰਦ ਸੇਰ,ਲੱਕੀ ਅਤੇ ਵਿਲਸਨ 'ਤੇ ਤੇਜਧਾਰ ਹਥਿਆਰਾਂ ਨਾਲ ਹਮਲਾ ਕਰ ਦਿੱਤਾ ਗਿਆ ਜਦਕਿ ਮਹੰਤਾਂ ਦੀ ਵੀ ਬੁਰੀ ਤਰ੍ਹਾਂ ਕੁੱਟਮਾਰ ਕੀਤੀ ਗਈ। ਦੂਜੇ ਪਾਸੇ ਜਖਮੀ ਸਾਜਨ ਨੇ ਦੱਸਿਆ ਕਿ ਇਹ ਇਲਾਕਾ ਸਾਡੇ ਅਧੀਨ ਹੈ ਅਤੇ ਅਸੀਂ ਉੱਥੇ ਵਧਾਈ ਲੈਣ ਗਏ ਸੀ ਕਿ ਇਸੇ ਦੌਰਾਨ ਉਕਤ ਵਿਅਕਤੀ ਵੀ ਉੱਥੇ ਆ ਗਏ ਅਤੇ ਸਾਡੇ ਪਿਤਾ-ਪੁੱਤਰ 'ਤੇ ਹਮਲਾ ਕਰਕੇ ਸਾਨੂੰ ਜਖਮੀ ਕਰ ਦਿੱਤਾ। ਪਿੰਡ ਭੋਪਰ ਸੈਦਾਂ ਵਿੱਚ ਦੋ ਕਿੰਨਰਾ ਦੇ ਗੁੱਟਾਂ ਵਿੱਚ ਹੋਈ ਲੜਾਈ ਸਬੰਧੀ ਜੌੜਾ ਚੌਕੀ ਦੇ ਇੰਚਾਰਜ ਜੀਵਨ ਸਿੰਘ ਨੇ ਦੱਸਿਆ ਕਿ ਦੋਵਾਂ ਧੜਿਆਂ ਦੇ ਬਿਆਨ ਦਰਜ ਕੀਤੇ ਜਾ ਰਹੇ ਹਨ। ਬਿਆਨ ਲੈ ਕੇ ਅਤੇ ਸਿਵਲ ਹਸਪਤਾਲ ਤੋਂ ਮੈਡੀਕਲ ਰਿਪੋਰਟ ਆਉਣ ਤੋਂ ਬਾਅਦ ਬਣਦੀ ਕਾਰਵਾਈ ਕੀਤੀ ਜਾਵੇਗੀ।