ਨੰਗਲ, 26 ਅਪ੍ਰੈਲ (ਸਤਨਾਮ ਸਿੰਘ) : ਬੀਤੀ ਰਾਤ ਨੰਗਲ ਥਾਣਾ ਤੋਂ ਮਹਿਜ ਕੁਝ ਦੂਰ ਅਤੇ ਆਈ ਬਲਾਕ ਚੌਂਕ ਤੇ ਨੰਗਲ ਨਗਰ ਕੌਂਸਲ ਵੱਲੋਂ ਲਗਾਏ ਸੀਸੀਟੀਵੀ ਕੈਮਰਿਆਂ ਦੀ ਛਤਰ ਛਾਇਆ ਹੇਂਠ ਦੋ ਗੁੱਟਾਂ ਵਿੱਚ ਤਲਵਾਰਾਂ ਨਾਲ ਖ਼ੂਨੀ ਝੜਪ ਹੋਈ। ਇਸ ਹਾਦਸੇ ਵਿੱਚ ਅੱਧਾ ਦਰਜ ਦੇ ਕਰੀਬ ਨੌਜਵਾਨਾਂ ਦੇ ਜ਼ਖ਼ਮੀ ਹੋਣ ਦਾ ਸਮਾਚਾਰ ਹੈ। ਜਿਨ੍ਹਾਂ ਵਿਚੋਂ ਤਿੰਨ ਨੌਜਵਾਨਾਂ ਦਾ ਨੰਗਲ ਸਿਵਲ ਹਸਪਤਾਲ ਵਿੱਚ ਇਲਾਜ ਚੱਲ ਰਿਹਾ ਹੈ।
ਪੱਤਰਕਾਰਾਂ ਨੂੰ ਜਾਣਕਾਰੀ ਦਿੰਦਿਆਂ ਸਿਵਲ ਹਸਪਤਾਲ ਨੰਗਲ ਵਿੱਚ ਜ਼ੇਰੇ ਇਲਾਜ ਦਾਖ਼ਲ ਰਾਹੁਲ ਨੇ ਕਿਹਾ ਕਿ ਉਹ ਡੱਬਲ ਐੱਫ ਬਲਾਕ ਦਾ ਰਹਿਣ ਵਾਲਾ ਹੈ। ਉਹ ਨੰਗਲ ਤੋਂ ਕੁਝ ਦੂਰ ਹਿਮਾਚਲ ਪ੍ਰਦੇਸ਼ ਮਹਿਤਪੁਰ ਵਿੱਚ ਇੱਕ ਬਾਰ ਤੇ ਕੰਮ ਕਰਦਾ ਹੈ ਤੇ ਬੀਤੀ ਰਾਤ ਜਦੋਂ ਉਹ ਕੰਮ ਤੇ ਜਾ ਰਿਹਾ ਸੀ ਤਾਂ ਅੱਧਾ ਦਰਜਨ ਨੌਜਵਾਨਾਂ ਤੇ ਉਸ ਉੱਤੇ ਤੇਜਧਾਰ ਹਥਿਆਰਾਂ ਨਾਲ ਹਮਲਾ ਕਰ ਦਿੱਤਾ ਤੇ ਇਸ ਹਮਲੇ ਵਿੱਚ ਉਸਦੇ ਸਿਰ ਤੇ ਗੰਭੀਰ ਸੱਟ ਵੱਜੀ ਹੈ। ਜ਼ਖ਼ਮੀ ਨੇ ਕਿਹਾ ਕਿ ਇਹ ਨੌਜਵਾਨ ਉਨ੍ਹਾਂ ਦੇ ਬਾਰ ਤੇ ਸ਼ਰਾਬ ਦਾ ਸੇਵਨ ਕਰਨ ਕਈ ਵਾਰ ਆਏ। ਇੱਕ ਵਾਰ ਇਨ੍ਹਾਂ ਦੀ ਪੈਸੇ ਦੇ ਲੈਣ ਦੇਣ ਨੂੰ ਲੈ ਕੇ ਸਾਡੇ ਵਾਰ ਵਿੱਚ ਵੀ ਕਾਫੀ ਬਹਿਸ ਹੋਈ। ਜਿਸ ਮਗਰੋਂ ਇਹ ਮੇਰੇ ਨਾਲ ਰੰਜਿਸ਼ ਰੱਖਣ ਲੱਗ ਪਏ ਤੇ ਜਦੋਂ ਮੈਂ ਬੀਤੀ ਰਾਤ ਕੰਮ ਤੇ ਜਾ ਰਿਹਾ ਸੀ ਤਾਂ ਇਨ੍ਹਾਂ ਨੇ ਮੇਰੇ ਤੇ ਕਿਰਪਾਨਾਂ ਨਾਲ ਹਮਲਾ ਕਰ ਦਿੱਤਾ। ਜਿਸਦੀ ਜਾਣਕਾਰੀ ਉਸ ਵੱਲੋਂ ਸਰਕਾਰੀ ਹੈਲਪ ਲਾਈਨ ਨੰਬਰ 112 ਤੇ ਸ਼ਿਕਾਇਤ ਕਰਕੇ ਕਰ ਦਿੱਤੀ ਗਈ ਹੈ।
ਜਦੋਂ ਪੱਤਰਕਾਰਾਂ ਨੂੰ ਪਤਾ ਲੱਗਿਆ ਕਿ ਦੂਜੀ ਧਿਰ ਦੇ ਵੀ ਨੌਜਵਾਨ ਹਸਪਤਾਲ ਦੀ ਤੀਜੀ ਮੰਜਲ ਤੇ ਦਾਖ਼ਲ ਹਨ ਤਾਂ ਉਨ੍ਹਾਂ ਤੋਂ ਜਾ ਕੇ ਜਦੋਂ ਘਟਨਾ ਵਾਰੇ ਪੁੱਛਿਆ ਤਾਂ ਉਨ੍ਹਾਂ ਕਿਹਾ ਕਿ ਰਾਹੁਲ ਝੂਠ ਬੋਲ ਰਿਹਾ ਹੈ। ਜ਼ਖ਼ਮੀ ਰੋਸ਼ਨ ਵਾਸੀ ਮੁੱਹਲਾ ਰਾਜ ਨਗਰ ਤੇ ਉਸਦੇ ਸਾਥੀਆਂ ਨੇ ਕਿਹਾ ਕਿ ਉਹ ਆਈਸ ਕਰੀਮ ਖਾਣ ਜਦੋਂ ਆਪਣੇ ਮੋਟਰ ਸਾਈਕਲ ਤੇ ਆਈ ਬਲਾਕ ਚੌਂਕ ਕੋਲ ਪਹੁੰਚੇ ਤਾਂ ਰਾਹੁਲ ਅਤੇ ਉਸਦੇ ਸਾਥੀਆਂ ਨੇ ਸਾਡੇ ਤੇ ਕਿਰਪਾਨਾ ਨਾਲ ਹਮਲਾ ਕਰ ਦਿੱਤਾ। ਜ਼ਖ਼ਮੀ ਰੋਸ਼ਨ ਨੇ ਕਿਹਾ ਕਿ ਮੇਰੇ ਸਿਰ ਤੇ 2 ਟਾਂਕੇ ਅਤੇ ਮੇਰੇ ਦੋਸ਼ਤ ਦੇ ਸਿਰ ਤੇ 6 ਦੇ ਕਰੀਬ ਟਾਂਕੇ ਲੱਗੇ ਹਨ। ਕਈ ਦੋਸਤਾਂ ਦੇ ਚਾਂਦੀ ਦੇ ਗਹਿਣੇ ਵੀ ਇਸ ਝਗੜੇ ਵਿੱਚ ਗਾਇਬ ਹਨ ਤੇ ਹੋਰ ਵੀ ਕਈ ਜ਼ਖ਼ਮੀ ਹਨ। ਉਨ੍ਹਾਂ ਕਿਹਾ ਕਿ ਰਾਹੁਲ ਅਤੇ ਉਸਦੇ ਕਰੀਬ ਇੱਕ ਦਰਜਨ ਸਾਥੀਆਂ ਨੇ ਸਾਡੇ ਤੇ ਹਮਲਾ ਕੀਤਾ। ਬੀਤੀ ਰਾਤ ਸੈਰ ਕਰਨ ਰਹੇ ਜਿਨ੍ਹਾਂ ਵੀ ਲੋਕਾਂ ਨੇ ਤੇਜਧਾਰ ਹਥਿਆਰਾਂ ਨਾਲ ਹੋ ਰਿਹਾ ਇਹ ਝਗੜਾ ਵੇਖਿਆ, ਸਭ ਖੌਫ ਵਿੱਚ ਹਨ। ਕਿਉਂਕਿ ਝਗੜਾ ਕਰਨ ਵਾਲੇ ਕੋਈ ਵੱਡੇ ਗੈਂਗਸਟਰ ਨਹੀਂ ਬਲਕਿ 20-22 ਸਾਲ ਦੇ ਨੌਜਵਾਨ ਹੀ ਹਨ। ਜੋ ਕਿ ਝਗੜੇ ਵਿੱਚ ਲਹੂ ਲੂਹਾਨ ਸੀ।
ਸਿਵਲ ਹਸਪਤਾਲ ਵਿੱਚ ਮਾਮਲੇ ਦੀ ਜਾਂਚ ਕਰਨ ਪਹੁੰਚੇ ਏਐਸਆਈ ਕੇਸ਼ਵ ਅਤੇ ਏਐਸਆਈ ਰਾਕੇਸ਼ ਕੁਮਾਰ ਨੇ ਕਿਹਾ ਕਿ ਦੋਨਾਂ ਧਿਰਾਂ ਦੇ ਬਿਆਨ ਦਰਜ ਕੀਤੇ ਜਾ ਰਹੇ ਹਨ। ਸੀਸੀਟੀਵੀ ਕੈਮਰੇ ਵੀ ਖੰਗਾਲੇ ਜਾ ਰਹੇ ਹਨ। ਬਣਦੀ ਜੋ ਵੀ ਕਾਰਵਾਈ ਹੋਵੇਗੀ ਉਹ ਕੀਤੀ ਜਾਵੇਗੀ।