ਸਰਹਿੰਦ ਨੇੜਿਓਂ ਭਾਖੜਾ ਨਹਿਰ 'ਚੋਂ ਮਿਲੀ ਸੀ ਮਿ੍ਰਤਕ ਦੀ ਹੁੰਡਈ ਵੈਨਿਊ ਕਾਰ
ਸ੍ਰੀ ਫ਼ਤਹਿਗੜ੍ਹ ਸਾਹਿਬ, 27 ਅਪ੍ਰੈਲ (ਰਵਿੰਦਰ ਸਿੰਘ ਢੀਂਡਸਾ) : ਪਰਸੋਂ ਰਾਤ ਤੋਂ ਲਾਪਤਾ ਦੱਸੇ ਜਾ ਰਹੇ ਮੰਡੀ ਗੋਬਿੰਦਗੜ੍ਹ ਦੇ ਲੋਹਾ ਵਪਾਰੀ ਸੰਤੋਸ਼ ਕੁਮਾਰ(35) ਦੀ ਲਾਸ਼ ਹਰਿਆਣਾ ਸੂਬੇ ਦੇ ਟੋਹਾਣਾ ਇਲਾਕੇ 'ਚੋਂ ਲੰਘਦੀ ਨਹਿਰ 'ਚੋਂ ਮਿਲਣ ਦਾ ਸਮਾਚਾਰ ਹੈ।ਸੰਤੋਸ਼ ਕੁਮਾਰ ਵਾਸੀ ਮੰਡੀ ਗੋਬਿੰਦਗੜ੍ਹ ਪਰਸੋਂ ਰਾਤ ਨੂੰ ਕਾਰ ਸਣੇ ਲਾਪਤਾ ਹੋ ਗਿਆ ਸੀ ਜਿਸ ਦੀ ਕਾਰ ਦੇ ਟਾਇਰਾਂ ਦੇ ਨਿਸ਼ਾਨ ਫਲੋਟਿੰਗ ਰੈਸਟੋਰੈਂਟ ਸਰਹਿੰਦ ਨੇੜਿਓਂ ਲੰਘਦੀ ਮੇਨ ਭਾਖੜਾ ਲਾਈਨ ਦੇ ਕੰਢੇ ਦੇਖੇ ਗਏ ਸਨ ਜਿਸ ਸਬੰਧੀ ਸੂਚਨਾ ਮਿਲਣ 'ਤੇ ਪੁਲਿਸ ਵੱਲੋਂ ਗੋਤਾਖੋਰਾਂ ਦੀ ਮੱਦਦ ਨਾਲ ਭਾਖੜਾ ਨਹਿਰ 'ਚ ਸੰਤੋਸ਼ ਕੁਮਾਰ ਦੀ ਭਾਲ ਕੀਤੀ ਜਾ ਰਹੀ ਸੀ।ਭੋਲੇ ਸ਼ੰਕਰ ਡਾਈਵਰਜ਼ ਕਲੱਬ ਦੇ ਪ੍ਰਧਾਨ ਸ਼ੰਕਰ ਭਾਰਦਵਾਜ ਨੇ ਦੱਸਿਆ ਕਿ ਉਨਾਂ ਦੀ ਟੀਮ ਦੇ ਗੋਤਾਖੋਰਾਂ ਵੱਲੋਂ ਨਹਿਰ 'ਚ ਕਾਰ ਸਣੇ ਰੁੜੇ ਸੰਤੋਸ਼ ਕੁਮਾਰ ਵਾਸੀ ਮੰਡੀ ਗੋਬਿੰਦਗੜ੍ਹ ਦੀ ਕੱਲ੍ਹ ਤੜਕੇ ਤੋਂ ਹੀ ਭਾਲ ਕੀਤੀ ਜਾ ਰਹੀ ਸੀ ਜਿਸ ਦੀ ਹੁੰਡਈ ਵੈਨਿਊ ਕਾਰ ਤਾਂ ਕੱਲ ਸੌਢਾਂ ਹੈੱਡ ਨੇੜਿਓਂ ਨਹਿਰ 'ਚੋਂ ਮਿਲ ਗਈ ਸੀ ਪਰ ਸੰਤੋਸ਼ ਕੁਮਾਰ ਕਾਰ 'ਚੋਂ ਨਹੀਂ ਮਿਲਿਆ ਜਿਸ 'ਤੇ ਪੰਜਾਬ ਅਤੇ ਹਰਿਆਣਾ ਦੇ ਗੋਤਾਖੋਰਾਂ ਵੱਲੋਂ ਮਿਲ ਕੇ ਸਰਚ ਅਪ੍ਰੇਸ਼ਨ ਸ਼ੁਰੂ ਕੀਤਾ ਗਿਆ ਜਿਸ ਦੌਰਾਨ ਸ਼ਨੀਵਾਰ ਸਵੇਰੇ ਹਰਿਆਣਾ ਦੇ ਟੋਹਾਣਾ ਇਲਾਕੇ 'ਚੋਂ ਲੰਘਦੀ ਨਹਿਰ 'ਚੋਂ ਸੰਤੋਸ਼ ਕੁਮਾਰ ਦੀ ਲਾਸ਼ ਬਰਾਮਦ ਹੋ ਗਈ।ਸ਼ੰਕਰ ਭਾਰਦਵਾਜ ਨੇ ਦੱਸਿਆ ਕਿ ਗੋਤਾਖੋਰਾਂ ਦਾ ਇਹ ਅਪ੍ਰੇਸ਼ਨ ਕਾਫੀ ਕਠਿਨ ਸੀ ਕਿਉਂਕਿ ਭਾਖੜਾ ਮੇਨ ਲਾਈਨ 'ਚ ਪਾਣੀ ਦਾ ਵਹਾਅ ਬਹੁਤ ਤੇਜ਼ ਹੁੰਦਾ ਹੈ ਜਿਸ ਕਾਰਨ ਕੁਝ ਹੀ ਸਮੇਂ 'ਚ ਮਿ੍ਰਤਕ ਦੀ ਲਾਸ਼ ਕਰੀਬ 120 ਕਿੱਲੋਮੀਟਰ ਦੂਰ ਟੋਹਾਣਾ ਨੇੜੇ ਪਹੁੰਚ ਗਈ।ਮਿ੍ਰਤਕ ਦੀ ਲਾਸ਼ ਨੂੰ ਸਿਵਲ ਹਸਪਤਾਲ ਦੀ ਮੌਰਚਰੀ 'ਚ ਰਖਵਾ ਕੇ ਥਾਣਾ ਸਰਹਿੰਦ ਦੀ ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।