ਸ੍ਰੀ ਫ਼ਤਹਿਗੜ੍ਹ ਸਾਹਿਬ/ 30 ਜਨਵਰੀ:
(ਰਵਿੰਦਰ ਸਿੰਘ ਢੀਂਡਸਾ)
“ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਮੀਰੀ-ਪੀਰੀ ਦੇ ਮਹਾਨ ਫਲਸਫੇ ਵਾਲੀ ਉਹ ਕੌਮੀ ਸੰਸਥਾ ਹੈ ਜੋ ਖਾਲਸਾ ਪੰਥ ਨੂੰ ਹਰ ਔਖੀ ਘੜੀ ਵਿਚ ਸਿਧਾਂਤਿਕ ਅਗਵਾਈ ਦੇਣ ਵਾਲੀ ਅਤੇ ਕੌਮ ਵਿਚ ਉੱਠਣ ਵਾਲੇ ਕਿਸੇ ਵੀ ਵਿਵਾਦ ਨੂੰ ਸਹੀ ਦਿਸ਼ਾ ਵਿੱਚ ਲਿਜਾ ਕੇ ਉਸਦਾ ਹੱਲ ਕਰਦੀ ਹੈ । ਨਾ ਕਿ ਰਾਜਸੀ ਦੰਗਲ ਦਾ ਅਖਾੜਾ ਬਣਾਉਣ ਵਾਲੇ ।”ਇਹ ਵਿਚਾਰ ਇਕਬਾਲ ਸਿੰਘ ਟਿਵਾਣਾ ਮੁੱਖ ਬੁਲਾਰਾ ਸਿਆਸੀ ਤੇ ਮੀਡੀਆ ਸਲਾਹਕਾਰ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ ਪ੍ਰਗਟ ਕੀਤੇ । ਉਨ੍ਹਾਂ ਕਿਹਾ ਕਿ ਖਾਲਸਾ ਪੰਥ ਵਿਚ ਧਾਰਮਿਕ ਅਤੇ ਰਾਜਸੀ ਤੌਰ ਤੇ ਮਨਫੀ ਹੋ ਚੁੱਕੇ ਦੋ ਸਿਆਸੀ ਧੜੇ ਬਾਦਲ ਦਲ ਅਤੇ ਸੁਧਾਰ ਲਹਿਰ ਦੇ ਆਗੂ ਸਾਡੀ ਇਸ ਸੰਸਥਾਂ ਦੀ ਦੁਰਵਰਤੋ ਕਰਕੇ ਆਪੋ ਆਪਣੀ ਗੁਆ ਚੁੱਕੀ ਰਾਜਸੀ ਤੇ ਸਮਾਜਿਕ ਸ਼ਕਤੀ ਨੂੰ ਪ੍ਰਾਪਤ ਕਰਨ ਲਈ ਤਰਲੋ ਮੱਛੀ ਹੋ ਰਹੇ ਹਨ ਅਤੇ ਇਸ ਨੂੰ ਰਾਜਸੀ ਦੰਗਲ ਦਾ ਅਖਾੜਾ ਬਣਾਉਣ ਦੀ ਬਜਰ ਗੁਸਤਾਖੀ ਕਰਦੇ ਹੋਏ ਨਜਰ ਆ ਰਹੇ ਹਨ । ਜਦੋਕਿ 2 ਦਸੰਬਰ 2024 ਨੂੰ ਸ੍ਰੀ ਅਕਾਲ ਤਖਤ ਸਾਹਿਬ ਦੀ ਫਸੀਲ ਤੋਂ ਇਹ ਹੁਕਮਨਾਮਾ ਜਾਰੀ ਹੋਇਆ ਸੀ ਕਿ ਇਨ੍ਹਾਂ ਦੋਵਾਂ ਧੜਿਆ ਦੇ ਆਗੂਆ ਨੂੰ ਹੁਣ ਕੌਮ ਦੇ ਧਾਰਮਿਕ ਤੇ ਰਾਜਸੀ ਤੌਰ ਤੇ ਅਗਵਾਈ ਕਰਨ ਦਾ ਕੋਈ ਇਖਲਾਕੀ ਹੱਕ ਬਾਕੀ ਨਹੀ ਰਿਹਾ । ਪਰ ਇਸ ਹੋਏ ਹੁਕਮਨਾਮੇ ਦੇ ਬਾਵਜੂਦ ਵੀ ਦੋਵੇ ਧੜਿਆ ਦੇ ਗੁਨਾਹਗਾਰ ਆਗੂ ਆਪੋ ਆਪਣੇ ਸਿਆਸੀ ਅਹੁਦਿਆ ਅਤੇ ਰਾਜਸੀ ਸ਼ਕਤੀ ਪ੍ਰਾਪਤ ਕਰਨ ਵਿਚ ਮਸਰੂਫ ਹਨ । ਇਨ੍ਹਾਂ ਹੋਏ ਹੁਕਮਨਾਮਿਆ ਉਪਰੰਤ ਸਤਿਕਾਰਯੋਗ ਸਿੰਘ ਸਾਹਿਬਾਨ ਦਾ ਇਹ ਕੌਮੀ ਫਰਜ ਬਣ ਜਾਂਦਾ ਸੀ ਕਿ ਦੋਵੇ ਦਾਗੀ ਤੇ ਬਾਗੀ ਹੋਏ ਧੜਿਆ ਦੇ ਆਗੂਆਂ ਦੀ ਸੋਚ ਨੂੰ ਪਣਪਨ ਲਈ ਢਿੱਲ ਦੇਣ ਦੀ ਬਜਾਇ ਦ੍ਰਿੜਤਾ ਤੇ ਦੂਰ ਅੰਦੇਸੀ ਨਾਲ ਅਜਿਹਾ ਅਮਲ ਹੋਵੇ ਜਿਸ ਨਾਲ ਸਮੁੱਚੇ ਵਿਚਰਦੇ ਰਾਜਸੀ ਧਾਰਮਿਕ ਧੜਿਆ ਦੇ ਆਗੂ ਸ੍ਰੀ ਅਕਾਲ ਤਖਤ ਸਾਹਿਬ ਜੀ ਦੇ ਮੀਰੀ ਪੀਰੀ ਦੇ ਸਿਧਾਂਤ ਦੀ ਅਗਵਾਈ ਹੇਠ ਸਮੂਹਿਕ ਰੂਪ ਵਿਚ ਸ਼੍ਰੋਮਣੀ ਅਕਾਲੀ ਦਲ ਦਾ ਪੂਨਰਗੰਠਨ ਕਰਕੇ ਕੇਵਲ ਇਕ ਹੀ ਕੌਮੀ ਸਿਆਸੀ ਪਾਰਟੀ ਸ਼੍ਰੋਮਣੀ ਅਕਾਲੀ ਦਲ ਅੱਗੇ ਆਵੇ ਜੋ ਪੰਜਾਬ ਸੂਬੇ, ਪੰਜਾਬੀਆਂ ਅਤੇ ਸਿੱਖ ਕੌਮ ਦੇ ਹੱਕ ਹਕੂਕਾਂ ਦੀ ਪੂਰਤੀ ਲਈ ਅਗਲੀ ਰਣਨੀਤੀ ਘੜਦੇ ਹੋਏ ਅਮਲ ਕਰੇ ।