ਸ੍ਰੀ ਫ਼ਤਹਿਗੜ੍ਹ ਸਾਹਿਬ/14 ਮਈ:
(ਰਵਿੰਦਰ ਸਿੰਘ ਢੀਂਡਸਾ)
ਨਸ਼ਿਆਂ ਦੇ ਵਿਰੁੱਧ ਜਾਗਰੂਕਤਾ ਵਧਾਉਣ ਵੱਲ ਇਕ ਮਹੱਤਵਪੂਰਨ ਕਦਮ ਚੁੱਕਦਿਆਂ, ਜ਼ਿਲ੍ਹਾ ਫਤਿਹਗੜ੍ਹ ਸਾਹਿਬ ਦੀ ਡਿਪਟੀ ਕਮਿਸ਼ਨਰ ਡਾ. ਸੋਨਾ ਥਿੰਡ ਨੇ “” ਨਸ਼ਾ ਵਿਰੋਧੀ ਜਾਗਰੂਕਤਾ ਮੈਰਾਥਨ ਲਈ ਅਧਿਕਾਰਿਕ ਟੀ-ਸ਼ਰਟ ਦਾ ਉਦਘਾਟਨ ਕੀਤਾ। ਇਹ ਮੈਰਾਥਨ ਰੋਟਰੀ ਕਲੱਬ ਸਰਹਿੰਦ ਅਤੇ ਜ਼ਿਲ੍ਹਾ ਪ੍ਰਸ਼ਾਸਨ ਫਤਿਹਗੜ੍ਹ ਸਾਹਿਬ ਵੱਲੋਂ ਮਿਲ ਕੇ ਕਰਵਾਈ ਜਾ ਰਹੀ ਹੈ।ਇਹ ਟੀ-ਸ਼ਰਟ ਨਸ਼ਿਆਂ ਖਿਲਾਫ ਲੜਾਈ ਦਾ ਪ੍ਰਤੀਕ ਹੈ ਅਤੇ ਇੱਕ ਸਿਹਤਮੰਦ, ਨਸ਼ਾ-ਮੁਕਤ ਸਮਾਜ ਵੱਲ ਸੱਦਾ ਹੈ।ਡਾ. ਥਿੰਦ ਨੇ ਇਸ ਪਹਿਲ ਦੀ ਪ੍ਰਸੰਸਾ ਕਰਦੇ ਹੋਏ ਆਖਿਆ ਕਿ ਨੌਜਵਾਨਾਂ ਅਤੇ ਆਮ ਲੋਕਾਂ ਨੂੰ ਅਜਿਹੀਆਂ ਸਕਾਰਾਤਮਕ ਸਰਗਰਮੀਆਂ ਰਾਹੀਂ ਜੁੜਨ ਲਈ ਉਤਸ਼ਾਹਤ ਕਰਨਾ ਅਤਿ ਜ਼ਰੂਰੀ ਹੈ ਤਾਂ ਜੋ ਨਸ਼ਿਆਂ ਵਿਰੁੱਧ ਸੰਦੇਸ਼ ਦਿੱਤਾ ਜਾ ਸਕੇ।ਮੈਰਾਥਨ ਸੰਬੰਧੀ ਦਿੱਤੀ ਗਈ ਜਾਣਕਾਰੀ ਮੁਤਾਬਕ, “ਰਨ ਫੋਰ ਲਾਈਫ” ਨਸ਼ਾ ਵਿਰੋਧੀ ਮੈਰਾਥਨ 18 ਮਈ 2025 ਨੂੰ ਸਵੇਰੇ 6:00 ਵਜੇ ਰੋਟਰੀ ਕਲੱਬ, ਆਮ ਖਾਸ ਬਾਗ, ਸਰਹਿੰਦ ਤੋਂ ਸ਼ੁਰੂ ਹੋਵੇਗੀ। ਜਿਸ ਵਿੱਚ ਜ਼ਿਲ੍ਹੇ ਭਰ ਤੋਂ ਨਾਗਰਿਕਾਂ, ਨੌਜਵਾਨਾਂ ਅਤੇ ਸਮਾਜਿਕ ਸੰਸਥਾਵਾਂ ਦੀ ਭਾਗੀਦਾਰੀ ਰਹੇਗੀ।ਜ਼ਿਲ੍ਹਾ ਡਿਪਟੀ ਕਮਿਸ਼ਨਰ ਫਤਿਹਗੜ੍ਹ ਸਾਹਿਬ ਦੀ ਪਹਿਲੀ ਨਾਗਰਿਕ ਹੋਣ ਦੇ ਨਾਤੇ ਡਾ. ਸੋਨਾ ਥਿੰਦ ਨੇ ਮੈਰਾਥਨ ਵਿੱਚ ਹਿੱਸਾ ਲੈਣ ਲਈ ਪਹਿਲਾ ਰਜਿਸਟ੍ਰੇਸ਼ਨ ਫਾਰਮ ਭਰਿਆ।ਇਸ ਮੈਰਾਥਨ ਨੂੰ ਸਹਿਯੋਗ ਦੇਣ ਵਾਲਿਆਂ ਵਿੱਚ ਬਾਬੂ ਜਗਦੀਸ਼ ਜਵੇਲਰਜ਼,ਮਾਧਵ ਕੇਆਰਜੀ ਗਰੁੱਪ,ਬੀ ਟਾਊਨ ਬਿਲਡਰਜ਼ ਅਤੇ ਮਾਈਂਡ ਕੇਅਰ ਹਸਪਤਾਲ ਦੇ ਨਾਮ ਸ਼ਾਮਲ ਹਨ ।ਡਾ. ਹਿਤੇਂਦਰ ਸੂਰੀ, ਪ੍ਰਧਾਨ, ਰੋਟਰੀ ਕਲੱਬ ਸਰਹਿੰਦ; ਰੋਟੇਰੀਅਨ ਵੀਨਿਤ ਸ਼ਰਮਾ, ਸਕੱਤਰ; ਰੋਟੇਰੀਅਨ ਸੁਨੀਲ ਬੈਕਟਰ, ਖ਼ਜ਼ਾਨਚੀ ਅਤੇ ਰੋਟੇਰੀਅਨ ਸਤਪਾਲ ਗਰਗ, ਪ੍ਰਾਜੈਕਟ ਇੰਚਾਰਜ ਨੇ ਡਾ. ਸੋਨਾ ਥਿੰਦ ਅਤੇ ਸਾਰੇ ਸਪਾਂਸਰਾਂ ਦਾ ਧੰਨਵਾਦ ਕਰਦਿਆਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਵੱਡੀ ਗਿਣਤੀ ਵਿੱਚ ਇਸ ਦੌੜ ਵਿੱਚ ਸ਼ਾਮਲ ਹੋਣ।