ਕਰੀਬ ਢਾਈ ਕਰੋੜ ਤੋਂ ਜਿਆਦਾ ਰਾਸੀ ਨਾਲ ਪੱਕੇ ਕੀਤੇ ਰਜਵਾਹੇ ਵਿੱਚ ਕੈਬਨਿਟ ਮੰਤਰੀ ਪੰਜਾਬ ਨੇ ਛੱਡਿਆ ਪਾਣੀ

ਪਠਾਨਕੋਟ 6 ਜੂਨ ( ਰਮਨ ਕਾਲੀਆ )

ਮਾਨਯੋਗ ਮੁੱਖ ਮੰਤਰੀ ਪੰਜਾਬ ਸ. ਭਗਵੰਤ ਸਿੰਘ ਮਾਨ ਜੀ ਦੀ ਸਰਕਾਰ ਲਗਾਤਾਰ ਪੰਜਾਬ ਦੇ ਅੰਦਰ ਕਿਸਾਨੀ ਮਸਲਿਆਂ ਨੂੰ ਲੈ ਕੇ ਧਰਤੀ ਹੇਠਲੇ ਪਾਣੀ ਦੇ ਪੱਧਰ ਨੂੰ ਉੱਚਾ ਕਰਨ ਲਈ ਅਤੇ ਧਰਤੀ ਹੇਠਲੇ ਪਾਣੀ ਨੂੰ ਬਚਾਉਂਣ ਦੇ ਲਈ ਨਹਿਰੀ ਪਾਣੀ ਨੂੰ ਖੇਤੀ ਵਿੱਚ ਪ੍ਰਯੋਗ ਕਰਨ ਤੇ ਜੋਰ ਦੇ ਰਹੀ ਹੈ ਅਤੇ ਸਰਕਾਰ ਦਾ ਉਪਰਾਲਾ ਹੈ ਕਿ ਜਿਆਦਾ ਤੋਂ ਜਿਆਦਾ ਕਿਸਾਨ ਖੇਤੀ ਨਹਿਰੀ ਪਾਣੀਆਂ ਨਾਲ ਹੀ ਕਰੇ। ਇਹ ਪ੍ਰਗਟਾਵਾ ਸ੍ਰੀ ਲਾਲ ਚੰਦ ਕਟਾਰੂਚੱਕ ਕੈਬਨਿਟ ਮੰਤਰੀ ਪੰਜਾਬ ਨੇ ਅੱਜ ਜਿਲ੍ਹਾ ਪਠਾਨਕੋਟ ਦੇ ਗੁਲਪੁਰ ਸਿੰਬਲੀ ਦੇ ਨਜਦੀਕ ਯੂ.ਬੀ.ਡੀ.ਸੀ. ਨਹਿਰ ਵਿੱਚੋਂ ਕੱਢੇ ਜਾ ਰਹੇ ਪੱਕੇ ਰਜਵਾਹੇ ਵਿੱਚ ਪਾਣੀ ਛੱਡਣ ਮਗਰੋਂ ਕੀਤਾ। ਇਸ ਮੋਕੇ ਤੇ ਹੋਰਨਾਂ ਤੋਂ ਇਲਾਵਾ ਸਰਵਸ੍ਰੀ ਨਰੇਸ ਕੁਮਾਰ ਸੈਣੀ ਜਿਲ੍ਹਾ ਪ੍ਰਧਾਨ ਬੀ.ਸੀ. ਵਿੰਗ ਪਠਾਨਕੋਟ , ਪਵਨ ਕੁਮਾਰ ਫੋਜੀ ਬਲਾਕ ਪ੍ਰਧਾਨ, ਵਿਜੈ ਕੁਮਾਰ ਕਟਾਰੂਚੱਕ, ਭੁਪਿੰਦਰ ਸਿੰਘ ਮੂੰਨਾ, ਸੰਦੀਪ ਕੁਮਾਰ ਬਲਾਕ ਪ੍ਰਧਾਨ ਅਤੇ ਪਾਰਟੀ ਕਾਰਜਕਰਤਾ ਅਤੇ ਨਜਦੀਕੀ ਪਿੰਡਾਂ ਦੇ ਲੋਕ ਵੀ ਹਾਜਰ ਸਨ।
ਇਸ ਮੋਕੇ ਤੇ ਜਾਣਕਾਰੀ ਦਿੰਦਿਆਂ ਸ੍ਰੀ ਲਾਲ ਚੰਦ ਕਟਾਰੂਚੱਕ ਕੈਬਨਿਟ ਮੰਤਰੀ ਪੰਜਾਬ ਨੇ ਕਿਹਾ ਕਿ ਪੰਜਾਬ ਸਰਕਾਰ ਦਾ ਬਹੁਤ ਵੱਡਾ ਉਪਰਾਲਾ ਹੈ ਕਿ ਨਹਿਰੀ ਪਾਣੀ ਨੂੰ ਖੇਤੀ ਕਾਰਜਾਂ ਵਿੱਚ ਪ੍ਰਯੋਗ ਕੀਤਾ ਜਾਵੈ ਇੱਕ ਪਾਸੇ ਇਹ ਪਾਣੀ ਵਿੱਚ ਫਸਲਾਂ ਲਈ ਮਿਨਰਲ ਜਿਆਦਾ ਹੋਣ ਕਰਕੇ ਪੈਦਾਵਾਰ ਵਿੱਚ ਵੀ ਵਾਧਾ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਖੁਸੀ ਦੀ ਗੱਲ ਹੈ ਕਿ ਜੋ ਸਾਡੇ ਪੰਜਾਬ ਵਿੱਚ ਮੋਗੇ ਹਨ, ਰਜਵਾਹੇ ਹਨ ਜੋ ਕਿ ਖੇਤੀ ਬਾੜੀ ਦੀ ਧਰੋਹਰ ਹਨ ਅਤੇ ਇਨ੍ਹਾਂ ਪਾਣੀਆਂ ਦੇ ਆਸਰੇ ਸਾਡੇ ਕਿਸਾਨ ਖੇਤੀ ਕਰਦੇ ਹਨ।
ਉਨ੍ਹਾਂ ਕਿਹਾ ਕਿ ਲੰਮੇ ਸਮੇਂ ਤੋਂ ਪੰਜਾਬ ਦੇ ਮੋਗੇ /ਰਜਵਾਹੇ ਕੱਚੇ ਸਨ ਜਿਸ ਨਾਲ ਕਿਸਾਨਾਂ ਨੂੰ ਖੇਤੀ ਕਰਨ ਵਿੱਚ ਭਾਰੀ ਦਿੱਕਤਾਂ ਆਉਂਦੀਆਂ ਸਨ ਅਤੇ ਕਿਸਾਨ ਨਹਿਰੀ ਪਾਣੀਆਂ ਦਾ ਪੂਰਨ ਲਾਭ ਨਹੀਂ ਲੈ ਸਕਦੇ ਸਨ। ਰਜਵਾਹੇ ਕੱਚੇ ਹੋਣ ਕਰਕੇ ਪਾਣੀ ਅੰਤਿਮ ਖੇਤਾਂ ਤੱਕ ਨਹੀਂ ਸੀ ਪਹੰਚਦਾ ਅਤੇ ਰਸਤੇ ਵਿੱਚ ਪੀ ਪਾਣੀ ਰਜਵਾਹੇ ਚੋਂ ਲੀਕ ਹੋ ਜਾਂਦਾ ਸੀ। ਉਨ੍ਹਾਂ ਕਿਹਾ ਕਿ ਅੱਜ ਲਗਭਗ 3.5 ਕਿਲੋਮੀਟਰ ਦਾ ਰਜਵਾਹਾ ਜਿਸ ਨੂੰ ਗੁਲਪੁਰ ਹੈਡ ਦੇ ਨਾਮ ਨਾਲ ਜਾਣਿਆ ਜਾਂਦਾ ਹੈ। ਉਨ੍ਹਾਂ ਦੱਸਿਆ ਕਿ ਇਹ ਰਜਵਾਹਾ ਕਰੀਬ 6-7 ਪਿੰਡਾਂ ਜਿਸ ਵਿੱਚ ਫਰੀਦਾਨਗਰ, ਕਟਾਰੂਚੱਕ, ਚਸਮਾਂ , ਜਕਰੋਰ, ਗੁਜਰਾਤ, ਖੰਨੀ ਖੂਹੀ, ਭੀਮਪੁਰ ਦੀ ਹਜਾਰਾਂ ਏਕੜ ਭੂਮੀ ਦੀ ਸਿੰਚਾਈ ਕਰਦਾ ਹੈ ਅਤੇ ਅੱਜ ਇਸ ਨਵੇਂ ਪੱਕੇ ਬਣੇ ਰਜਵਾਹੇ ਜਿਸ ਤੇ ਕਰੀਬ ਢਾਈ ਕਰੋੜ ਰੁਪਏ ਤੋਂ ਜਿਆਦਾ ਰਾਸੀ ਖਰਚ ਕੀਤੀ ਗਈ ਹੈ ਦੇ ਅੰਦਰ ਪਾਣੀ ਛੱਡਿਆ ਗਿਆ ਹੈ ਇਸ ਲਈ ਸਾਰੇ ਕਿਸਾਨਾਂ ਨੂੰ ਇਸ ਦੀਆਂ ਵਧਾਈਆਂ ਹਨ। ਉਨ੍ਹਾਂ ਕਿਹਾ ਕਿ ਇਸ ਰਜਵਾਹੇ ਦੇ ਬਣਨ ਨਾਲ ਹੁਣ ਕਿਸਾਨਾਂ ਨੂੰ ਖੇਤੀ ਲਈ ਪੂਰਨ ਰੂਪ ਵਿੱਚ ਪਾਣੀ ਮਿਲ ਸਕੇਗਾ।
ਉਨ੍ਹਾਂ ਕਿਹਾ ਕਿ ਹੁਣ ਇਕੱਲੇ ਇਕੱਲੇ ਖੇਤਾਂ ਨੂੰ ਪਾਣੀ ਮਿਲੇਗਾ ਅਤੇ ਕਰੀਬ 8ਤੋਂ 10 ਹਜਾਰ ਏਕੜ ਜਮੀਨ ਇਸ ਰਜਵਾਹੇ ਦੇ ਪਾਣੀ ਨਾਲ ਸਿੰਚਾਈ ਹੋ ਸਕੇਗੀ। ਉਨ੍ਹਾਂ ਕਿਸਾਨਾਂ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਧਰਤੀ ਹੇਠਲੇ ਪਾਣੀ ਨੂੰ ਬਚਾਉਂਣਾ ਚਾਹੀਦਾ ਹੈ ਅਤੇ ਨਹਿਰੀ ਪਾਣੀਆਂ ਨੂੰ ਪਹਿਲ ਦਿੰਦਿਆਂ ਖੇਤੀ ਦੇ ਪ੍ਰਯੋਗ ਵਿੱਚ ਲਿਆਉਂਣਾ ਚਾਹੀਦਾ ਹੈ।