ਦੇਸ਼ ਵਾਸੀ ਸਵਾਰਥੀ ਸੋਚ ਵਾਲੇ “ਦਲ-ਬਦਲੂਆਂ” ਨੂੰ ਹਰਾ ਕੇ ਮਨੁੱਖਤਾ ਪੱਖੀ ਸੋਚ ਰੱਖਣ ਵਾਲੇ ਉਮੀਦਵਾਰਾਂ ਨੂੰ ਜਿਤਾਉਣ : ਟਿਵਾਣਾ

ਸ੍ਰੀ ਫ਼ਤਹਿਗੜ੍ਹ ਸਾਹਿਬ, 18 ਅਪ੍ਰੈਲ:
(ਰਵਿੰਦਰ ਸਿੰਘ ਢੀਂਡਸਾ)

“ਇੰਡੀਆਂ ਦੇ ਸਮੁੱਚੇ ਸੂਬਿਆਂ ਵਿਚ ਇਹ ਅਤਿ ਮਾੜੀ ਪਿਰਤ ਭਾਰੂ ਹੋਣ ਦੇ ਅਮਲ ਸਾਹਮਣੇ ਆ ਰਹੇ ਹਨ ਕਿ ਜੇਕਰ ਕੋਈ ਸਿਆਸੀ ਪਾਰਟੀ ਆਪਣੇ ਕਿਸੇ ਆਗੂਆਂ ਨੂੰ ਚੋਣ ਉਮੀਦਵਾਰ ਨਹੀ ਬਣਾਉਂਦੀ ਅਤੇ ਜੋ ਆਗੂ ਆਪਣੀ ਮਾਤ ਪਾਰਟੀ ਨੂੰ ਛੱਡਕੇ ਆਪਣੇ ਸਵਾਰਥੀ ਤੇ ਮਾਲੀ ਹਿੱਤਾਂ ਦੀ ਪੂਰਤੀ ਲਈ ਦੂਸਰੀ ਪਾਰਟੀ ਵਿਚ ਉਮੀਦਵਾਰ ਬਣਨ ਲਈ ਚਲਾ ਜਾਂਦਾ ਹੈ । ਚੋਣਾਂ ਦੇ ਮੌਸਮ ਵਿਚ ਪਾਰਟੀਆਂ ਬਦਲਣ ਵਾਲਿਆਂ ਦੀ ਬਹੁਤੀ ਗਿਣਤੀ ਉਨ੍ਹਾਂ ਲੋਕਾਂ ਦੀ ਹੈ ਜੋ 3-3, 4-4 ਪਾਰਟੀਆਂ ਬਦਲਕੇ ‘ਟਿਕਟੂ’ ਬਣਕੇ ਸਿਧਾਤਾਂ ਤੇ ਸੋਚ ਨੂੰ ਤਿਲਾਂਜਲੀ ਦੇ ਚੁੱਕੇ ਹਨ । ਅਜਿਹੇ ਆਗੂਆਂ ਤੋਂ ਮੁਲਕ, ਸਮਾਜ, ਕੌਮ ਜਾਂ ਮਨੁੱਖਤਾ ਦੀ ਕਿਸੇ ਤਰ੍ਹਾਂ ਦੀ ਬਿਹਤਰੀ ਦੀ ਕੋਈ ਉਮੀਦ ਨਹੀ ਰੱਖੀ ਜਾ ਸਕਦੀ । ਕਿਉਂਕਿ ਅਜਿਹੇ ਆਗੂ ਗਲਤ ਢੰਗਾਂ ਰਾਹੀ ਧਨ-ਦੌਲਤਾਂ, ਜਾਇਦਾਦਾਂ ਦੇ ਭੰਡਾਰ ਇਕੱਤਰ ਕਰਨ ਜਾਂ ਆਪਣੀਆ ਸਿਆਸੀ ਚੌਧਰਾਂ ਨੂੰ ਹਰ ਕੀਮਤ ਤੇ ਕਾਇਮ ਰੱਖਣ ਹਿੱਤ ਕਿਸੇ ਵੀ ਨੀਵੇਂ ਤੋ ਨੀਵੇਂ ਪੱਧਰ ਤੱਕ ਜਾ ਸਕਦੇ ਹਨ। ਇਸ ਲਈ ਮੁਲਕ ਦੇ ਨਿਵਾਸੀਆਂ ਤੇ ਇੱਥੋਂ ਦੇ ਸੂਝਵਾਨ ਵੋਟਰਾਂ ਨੂੰ ਚਾਹੀਦਾ ਹੈ ਕਿ ਅਜਿਹੇ ਦਲ-ਬਦਲੂਆਂ ਨੂੰ ਪੂਰਨ ਰੂਪ ਵਿਚ ਨਕਾਰਕੇ ਅਜਿਹੇ ਉਮੀਦਵਾਰਾਂ ਨੂੰ ਅੱਗੇ ਲਿਆਉਣ ਜੋ ਤਿਆਗ, ਸਬਰ, ਨਿਮਰਤਾ ਅਤੇ ਅਸਲੀਅਤ ਵਿਚ ਮਨੁੱਖਤਾ ਦੀ ਸੇਵਾ ਕਰਨ ਦੀ ਵਿਚਾਰਧਾਰਾ ਰੱਖਦੇ ਹੋਣ ।”ਇਹ ਵਿਚਾਰ ਇਕਬਾਲ ਸਿੰਘ ਟਿਵਾਣਾ ਮੁੱਖ ਬੁਲਾਰਾ ਸਿਆਸੀ ਤੇ ਮੀਡੀਆ ਸਲਾਹਕਾਰ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ ਪ੍ਰਗਟ ਕੀਤੇ ।