ਚੋਰਾਂ ਨੇ ਇਕੋ ਰਾਤ ਤਿੰਨ ਦੁਕਾਨਾਂ ਨੂੰ ਬਣਾਇਆ ਨਿਸ਼ਾਨਾ,ਹਜਾਰਾਂ ਰੁਪਏ ਦੀ ਨਗਦੀ ਅਤੇ ਲੇਡੀਜ ਸੂਟ ਚੋਰੀ

ਚੋਰ ਜਾਂਦੇ ਵਕਤ ਦੁਕਾਨਾਂ ‘ਚ ਲੱਗੇ ਡੀ.ਵੀ.ਆਰ ਵੀ ਨਾਲ ਲੈ ਗਏ,ਪੁਲਸ ਜਾਂਚ ‘ਚ ਜੁਟੀ

ਤਪਾ ਮੰਡੀ, 26 ਅਪ੍ਰੈਲ (ਯਾਦਵਿੰਦਰ ਸਿੰਘ ਤਪਾ) : ਸਥਾਨਕ ਸ਼ਹਿਰ ‘ਚ ਚੋਰਾਂ ਵੱਲੋਂ ਇੱਕੋ ਰਾਤ ਤਿੰਨ ਦੁਕਾਨਾਂ ਦੇ ਜਿੰਦਰਿਆਂ ਦੀ ਕਿਸੇ ਲੋਹੇ ਦੀ ਰਾਡ ਨਾਲ ਭੰਨ੍ਹਤੋੜ ਕਰਕੇ ਹਜਾਰਾਂ ਰੁਪਏ ਦੀ ਨਗਦੀ,ਲੇਡੀਜ ਸੂਟ,2ਡੀਵੀਆਰ ਅਤੇ ਵਾਈ.ਫਾਈ ਤੋੜ ਕੇ ਚੋਰੀ ਕਰਕੇ ਲੈ ਜਾਣ ਦਾ ਸਮਾਚਾਰ ਮਿਲਿਆ ਹੈ। ਇਨ੍ਹਾਂ ਚੋਰੀਆਂ ਨੂੰ ਲੈਕੇ ਵਪਾਰੀ ਵਰਗ ਅਤੇ ਆਮ ਲੋਕਾਂ ‘ਚ ਭਾਰੀ ਦਹਿਸ਼ਤ ਦਾ ਮਾਹੌਲ ਦੇਖਣ ਨੂੰ ਮਿਲ ਰਿਹਾ ਹੈ। ਇਸ ਬਾਰੇ ਗੁਪਤਾ ਮੈਡੀਕਲ ਏਜੰਸੀ,ਨੇੜੇ ਬਾਬਾ ਮੱਠ ਦੇ ਮਾਲਕ ਵਿਨੈ ਗੁਪਤਾ ਅਤੇ ਐਸ.ਪੀ ਬ੍ਰਾਦਰਜ ਦੇ ਮਾਲਕ ਸੱਤ ਪਾਲ ਸਿੰਘ ਨੇ ਦੱਸਿਆ ਕਿ ਸਵੇਰੇ 4 ਕੁ ਵਜੇ ਨੇੜਲੇ ਘਰ ਦੇ ਮਾਲਕਾਂ ਅਨੁਸਾਰ ਉਨ੍ਹਾਂ ਦੀਆਂ ਮੱਝਾਂ ਰਿਂਗਣ ਲੱਗਣ ਤੇ ਉਨ੍ਹਾਂ ਅਪਣੇ ਸੀ.ਸੀ.ਟੀ.ਵੀ ਕੈਮਰੇ ਦੇਖੇ ਤਾਂ ਪੰਜ ਨੌਜਵਾਨ ਜਿਨ੍ਹਾਂ ਅਪਣੇ ਮੂੰਹ ਸਿਰ ਲਪੇਟੇ ਹੋਏ ਸੀ ਇੱਕ ਸਵਿਫਟ ਕਾਰ ‘ਚ ਦੁਕਾਨਾਂ ‘ਚੋਂ ਚੋਰੀ ਕਰਕੇ ਕੱਪੜਾ ਰੱਖ ਰਹੇ ਸੀ ਤਾਂ ਉਨ੍ਹਾਂ ਨੇ ਤੁਰੰਤ ਦੁਕਾਨ ਮਾਲਕਾਂ ਨੂੰ ਇਸ ਦੀ ਇਤਲਾਹ ਦਿੱਤੀ ਤਾਂ ਮਾਲਕਾਂ ਦੇ ਪਹੁੰਚਣ ਤੇ ਪਤਾ ਲੱਗਾ ਕਿ ਚੋਰਾਂ ਨੇ ਸ਼ਟਰਾਂ ਦੇ ਜਿੰਦਰੇ ਕਿਸੇ ਲੋਹੇ ਦੀ ਰਾਡ ਨਾਲ ਖੋਲ੍ਹਕੇ ਵਿਨੈ ਗੁਪਤਾ ਦੀ ਮੈਡੀਕਲ ਸਟੋਰ ‘ਚੋਂ ਚੋਰ ਡੀ.ਵੀ.ਆਰ ਅਤੇ ਵਾਈ ਫਾਈ ਸਮੇਤ ਪੰਜ ਸੋ ਰੁਪਏ ਚੋਰੀ ਕਰਕੇ ਲੈ ਗਏ ਅਤੇ ਦੂਸਰੀ ਦੁਕਾਨ ‘ਚ ਜਿਨ੍ਹਾਂ ਲਗਭਗ ਡੇਢ ਮਹੀਨਾਂ ਪਹਿਲਾਂ ਹੀ ਖੋਲ੍ਹੀ ਸੀ ਮਹਿਲਾਵਾਂ ਕੱਪੜਾ ਵੇਚਣ ਦਾ ਕੰਮ ਕਰਦੀਆਂ ਸੀ ‘ਚ ਲੇਡੀਜ ਸੂਟਾਂ ਦੇ ਥਾਨ ਅਤੇ ਚੁੰਨੀਆਂ ਚੋਰੀ ਕਰਕੇ ਲੈ ਗਏ ਜਿਨ੍ਹਾਂ ਦੀ ਅੰਦਾਜਨ ਕੀਮਤ 30 ਹਜਾਰ ਰੁਪਏ ਦੇ ਕਰੀਬ ਬਣਦੀ ਹੈ। ਇਸੇ ਤਰ੍ਹਾਂ ਚੋਰਾਂ ਨੇ ਤਾਜੋਕੇ ਰੋਡ ਸਥਿਤ ਕਿਸਾਨ ਬੀਜ ਭੰਡਾਰ ਦੇ ਮਾਲਕ ਸੁਭਾਸ਼ ਗੁਪਤਾ ਅਨੁਸਾਰ ਉਨ੍ਹਾਂ ਨੂੰ ਕਿਸੇ ਗੁਆਂਢੀ ਦਾ ਫੋਨ ਆਇਆ ਕਿ ਸ਼ਟਰ ਉਪਰ ਚੁਕਿਆਂ ਪਿਆ ਹੈ,ਜਦੋਂ ਮਾਲਕ ਅਪਣੇ ਪੁੱਤਰ ਨਾਲ ਪਹੁੰਚਾ ਤਾਂ ਦੇਖਿਆ ਕਿ ਸ਼ਟਰ ਦਾ ਦੇਹਲੀ ਲਾਕ ਅਤੇ ਸ਼ਟਰਾਂ ਨੂੰ ਲੱਗੇ ਜਿੰਦਰਿਆਂ ਦੀ ਭੰਨ੍ਹਤੋੜ ਕਰਕੇ ਦੁਕਾਨ ‘ਚੋਂ ਲੱਗਿਆਂ ਡੀ.ਵੀ.ਆਰ ਅਤੇ ਵਾਈ ਫਾਈ ਤੋਂ ਇਲਾਵਾ 10-15 ਹਜਾਰ ਰੁਪਏ ਦੀ ਨਗਦੀ ਚੋਰੀ ਕਰਕੇ ਲੈ ਗਏ,ਚੋਰਾਂ ਨੇ ਸ਼ਟਰ ਨਾਲੋਂ ਜਿੰਦਰਾ ਤੋੜਕੇ ਗੁਆਂਢੀਆਂ ਦੇ ਗੇਟ ਨੂੰ ਲਾ ਦਿੱਤਾ ਤਾਂ ਕਿ ਗੁਆਂਢੀ ਖੜਕਾ ਸੁਣਕੇ ਬਾਹਰ ਨਾ ਆ ਜਾਣ। ਉਕਤ ਚੋਰੀਆਂ ਸੰਬੰਧੀ ਜਦ ਵਪਾਰੀਆਂ ਅਤੇ ਪੁਲਸ ਨੂੰ ਪਤਾ ਲੱਗਾ ਤਾਂ ਚੌਂਕੀ ਇੰਚਾਰਜ ਕਰਮਜੀਤ ਸਿੰਘ ਅਤੇ ਹਵਾਲਦਾਰ ਅਮਨਿੰਦਰ ਸਿੰਘ ਦੀ ਅਗਵਾਈ ‘ਚ ਪਹੁੰਚਕੇ ਮੋਕੇ ਦਾ ਜਾਇਜਾ ਲੈਕੇ ਉਚ-ਅਧਿਕਾਰੀਆਂ ਨੂੰ ਸੂਚਨਾ ਦਿੱਤੀ ਗਈ। ਪੁਲਸ ਦਾ ਕਹਿਣਾ ਹੈ ਕਿ ਉਹ ਇਲਾਕੇ ਭਰ ‘ਚ ਲੱਗੇ ਸੀਸੀਟੀਵੀ ਕੈਮਰੇ ਖੰਘਾਲਣ ਤੋਂ ਪਤਾ ਲੱਗਾ ਹੈ ਕਿ ਕਾਰ ‘ਚ ਸਵਾਰ ਪੰਜ ਮੈਂਬਰੀ ਚੋਰਾਂ ਦੇ ਗਿਰੋਹ ਨੇ ਸਵੇਰੇ 3-30 ਵਜੇ ਕਰੀਬ ਅੰਜਾਮ ਦਿੱਤਾ ਹੈ। ਇਨ੍ਹਾਂ ਚੋਰੀ ਦੀ ਘਟਨਾਵਾਂ ਨੂੰ ਲੈਕੇ ਵਪਾਰੀਆਂ ‘ਚ ਭਾਰੀ ਸਹਿਮ ਪਾਇਆ ਜਾ ਰਿਹਾ ਹੈ ਉਨ੍ਹਾਂ ਜਿਲਾ ਪੁਲਸ ਮੁੱਖੀ ਤੋਂ ਮੰਗ ਕੀਤੀ ਹੈ ਕਿ ਸ਼ਹਿਰ ਦੇ ਥਾਣਿਆਂ ‘ਚ ਨਫਰੀ ਵਧਾਕੇ ਦਿਨ-ਰਾਤ ਦੀ ਪੀ.ਸੀ.ਆਰ ਮੋਟਰਸਾਇਕਲਾਂ ਦੀ ਗਸ਼ਤ ਤੇਜ ਕੀਤੀ ਜਾਵੇ ਤਾਂ ਕਿ ਵਪਾਰੀ ਵਰਗ ਅਪਣਾ ਵਪਾਰ ਕਰ ਸਕਣ। ਦੱਸਣਯੋਗ ਹੈ ਕਿ ਕੁਝ ਦਿਨ ਪਹਿਲਾਂ ਕੁਝ ਲੁਟੇਰਿਆਂ ਨੇ ਇੱਕ ਮੈਡੀਕਲ ਸਟੋਰ ਦੇ ਮਾਲਕ ਨੂੰ ਵੀ ਲੁੱਟਣ ਦੀ ਕੋਸ਼ਿਸ ਕੀਤੀ ਗਈ ਸੀ ਪਰ ਉਸ ਦਾ ਵੀ ਅਜੇ ਤੱਕ ਕੋਈ ਸੁਰਾਗ ਨਹੀਂ ਨਿਕਲਿਆਂ ਹੈ।