ਭਾਕਿਯੂ ਡਕੋਂਦਾ ਵੱਲੋਂ 31 ਮਾਰਚ ਨੂੰ ਬਠਿੰਡਾ ਰੋਡ ਹੱਦ ਤੋਂ ਮੋਰਚਾ ਹਟਾਉਣ ਦਾ ਐਲਾਨ
- ਭਾਕਿਯੂ ਸਿੱਧੂਪੁਰ ਦਾ ਮਲੋਟ ਰੋਡ ਹੱਦ ’ਤੇ ਜਾਰੀ ਰਹੇਗਾ ਲਗਾਤਾਰ ਮੋਰਚਾ
- ਵਪਾਰੀਆਂ ਤੇ ਦੁਕਾਨਦਾਰਾਂ ਵੱਲੋਂ ਨਾਕੇਬੰਦੀਆਂ ਖਿਲਾਫ਼ 30 ਤੋਂ ਸੰਘਰਸ਼ ਦਾ ਐਲਾਨ
ਡੱਬਵਾਲੀ, 28 ਮਾਰਚ (ਇਕਬਾਲ ਸਿੰਘ ਸ਼ਾਂਤ) : ਡੱਬਵਾਲੀ ਵਾਸੀਆਂ ਨੂੰ ਦੋਹਰੀ ਨਾਕੇਬੰਦੀ ਤੋਂ 50 ਫ਼ੀਸਦੀ ਛੁਟਕਾਰਾ ਮਿਲਣ ਦਾ ਰਾਹ ਪੱਧਰਾ ਹੋ ਗਿਆ ਹੈ। ਭਾਕਿਯੂ ਡਕੌਂਦਾ ਨੇ ਇੱਥੇ ਬਠਿੰਡਾ ਰੋਡ ਹੱਦ ’ਤੇ ਮੋਰਚੇ ਨੂੰ 31 ਮਾਰਚ ਨੂੰ ਮੁਲਤਵੀ ਕਰਨ ਦਾ ਐਲਾਨ ਕਰ ਦਿੱਤਾ ਹੈ। ਜਦਕਿ ਦੂਜੇ ਪਾਸੇ ਮਲੋਟ ਰੋਡ ਹੱਦ ’ਤੇ ਭਾਕਿਯੂ (ਸਿੱਧੂਪੁਰ) ਨੇ ਮੋਰਚਾ ਜਾਰੀ ਰੱਖਣ ਦੀ ਗੱਲ ਆਖੀ ਹੈ। ਭਾਕਿਯੂ (ਸਿੱਧੂਪੁਰ) ਦੇ ਬਲਾਕ ਜਨਰਲ ਸਕੱਤਰ ਹਰਭਗਵਾਨ ਸਿੰਘ ਲੰਬੀ ਮੁਤਾਬਕ ਜਥੇਬੰਦੀ ਦਾ ਮਲੋਟ ਰੋਡ ਹੱਦ ’ਤੇ ਮੋਰਚਾ ਲਗਾਤਾਰ ਜਾਰੀ ਰਹੇਗਾ।
ਇਸੇ ਵਿਚਕਾਰ ਨਾਕੇਬੰਦੀਆਂ ਤੋਂ ਡੱਬਵਾਲੀ ਦੇ ਵਪਾਰੀ ਆਗੂ ਅਤੇ ਦੁਕਾਨਦਾਰਾਂ ਨੇ ਅੱਜ ਸਿਵਲਰ ਜੁਬਲੀ ਚੌਕ ’ਤੇ ਇਕੱਠੇ ਹੋ ਕੇ ਨਾਕੇਬੰਦੀਆਂ ਨੂੰ ਖੋਲ੍ਹਣ ਦੀ ਮੰਗ ਕੀਤੀ। ਵਪਾਰੀਆਂ ਨੇ ਡੀਐਸਪੀ ਨੂੰ ਮੰਗ ਪੱਤਰ ਦੇ ਕੇ 30 ਮਾਰਚ ਨੂੰ ਧਰਨਾ ਸ਼ੁਰੂ ਕਰਨ ਦੀ ਚਿਤਾਵਨੀ ਦਿੱਤੀ। ਪਰਸੋਂ ਮਲੋਟ ਰੋਡ ਹੱਦ ’ਤੇ ਡੱਬਵਾਲੀ ਅਤੇ ਮੰਡੀ ਕਿੱਲਿਆਂਵਾਲੀ ਦੇ ਦੁਕਾਨਦਾਰਾਂ ਨੇ ਸਾਂਝਾ ਧਰਨਾ ਲਗਾ ਕੇ ਨਾਕੇਬੰਦੀਆਂ ਹਟਾਉਣ ਦੀ ਮੰਗ ਕੀਤੀ ਸੀ। ਬਠਿੰਡਾ ਰੋਡ ਹੱਦ ਖੋਲ੍ਹਣ ਬਾਰੇ ਭਾਕਿਯੂ ਡਕੌਂਦਾ ਯੂਨੀਅਨ ਦੇ ਜ਼ਿਲ੍ਹਾ ਬਠਿੰਡਾ ਦੇ ਸਕੱਤਰ ਹਰਵਿੰਦਰ ਸਿੰਘ ਕੋਟਲੀ ਨੇ ਦੱਸਿਆ ਕਿ 31 ਮਾਰਚ ਨੂੰ ਮੋਰਚਾ ਮੁਲਤਵੀ ਹੋ ਜਾਵੇਗਾ ਅਤੇ ਚੋਣਾਂ ਮਗਰੋਂ ਜਥੇਬੰਦਕ ਫੈਸਲੇ ਮੁਤਾਬਕ ਆਗਾਮੀ ਸੰਘਰਸ਼ ਵਿੱਢਿਆ ਜਾਵੇਗਾ। ਇਸੇ ਵਿਚਕਾਰ ਵਪਾਰੀ ਆਗੂ ਗੁਰਦੀਪ ਕਾਮਰਾ ਨੇ ਦੱਸਿਆ ਕਿ ਨਾਕੇਬੰਦੀਆਂ ਕਾਰਨ ਸ਼ਹਿਰ ਦਾ ਵਪਾਰ ਠੱਪ ਹੋ ਗਿਆ ਹੈ। ਪ੍ਰਸ਼ਾਸਨ ਵੱਲੋਂ ਨਾਕੇਬੰਦੀਆਂ ਹਟਾਉਣ ਲਈ ਕੋਈ ਕਦਮ ਨਹੀਂ ਚੁੱਕਿਆ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ 30 ਮਾਰਚ ਤੱਕ ਨਾਕੇ ਨਾ ਖੋਲ੍ਹੇ ਗਏ ਤਾਂ ਧਰਨੇ ਮਗਰੋਂ ਸ਼ਹਿਰ ਬੰਦ ਕਰਨ ਦਾ ਕਦਮ ਪੁੱਟਿਆ ਜਾਵੇਗਾ। ਦੂਜੇ ਪਾਸੇ ਡੱਬਵਾਲੀ ਦੇ ਡੀਐਸਪੀ ਕਿਸ਼ੋਰੀ ਲਾਲ ਨੇ ਕਿਹਾ ਕਿ ਦੁਕਾਨਦਾਰਾਂ ਨੇ ਨਾਕੇਬੰਦੀਆਂ ਖੋਲ੍ਹਣ ਲਈ ਮੰਗ ਪੱਤਰ ਸੌਂਪਿਆ ਹੈ। ਜੇਕਰ ਕਿਸਾਨ ਹੱਦਾਂ ਤੋਂ ਮੋਰਚੇ ਹਟਾ ਦੇਣਗੇ ਤਾਂ ਸਰਕਾਰ ਦੇ ਨਿਰਦੇਸ਼ਾਂ ਮੁਤਾਬਕ ਆਗਾਮੀ ਕਾਰਵਾਈ ਅਮਲ ਵਿੱਚ ਲਿਆ ਕੇ ਜਨਤਾ ਨੂੰ ਰਾਹਤ ਦਿਵਾਈ ਜਾਵੇਗੀ।