ਬਠਿੰਡਾ, 15 ਮਾਰਚ, ਬੀ ਐੱਸ ਭੁੱਲਰ
ਹੋਟਲ ਮਾਲਕ ਨੂੰ ਲੁੱਟਣ ਵਾਲੇ ਛੇ ਲੁਟੇਰਿਆਂ ਨੂੰ ਬਠਿੰਡਾ ਪੁਲਿਸ ਨੇ ਗਿਰਫਤਾਰ ਕਰਨ ਵਿੱਚ ਸਫ਼ਲਤਾ ਹਾਸਲ ਕੀਤੀ ਹੈ। ਇਹ ਲੁਟੇਰੇ ਇੱਕ ਕਾਰ ਵਿੱਚ ਭੁੱਚੋ ਮੰਡੀ ਦੇ ਖੇਤਰ ਵਿੱਚ ਘੁੰਮ ਰਹੇ ਸਨ, ਪਤਾ ਲੱਗਣ ਤੇ ਪੁਲਿਸ ਦੀ ਇੱਕ ਟੀਮ ਨੇ ਉਹਨਾਂ ਦਾ ਪਿੱਛਾ ਕੀਤਾ। ਲੁਟੇਰਿਆਂ ਨੇ ਪੁਲਿਸ ਉੱਪਰ ਏ ਕੇ 47 ਰਾਈਫਲ ਨਾਲ ਗੋਲੀਆਂ ਚਲਾ ਕੇ ਭੱਜਣ ਦਾ ਯਤਨ ਕੀਤਾ ਤਾਂ ਪੁਲਿਸ ਦੀ ਜਵਾਬੀ ਗੋਲੀਬਾਰੀ ਨਾਲ ਇੱਕ ਲੁਟੇਰਾ ਜ਼ਖਮੀ ਹੋ ਗਿਆ। ਪੁਲਿਸ ਨੇ ਫੁਰਤੀ ਦਿਖਾਉਂਦਿਆਂ ਇਸ ਸੰਖੇਪ ਜਿਹੇ ਮੁਕਾਬਲੇ ਨਾਲ ਉਸਦੇ ਸਾਥੀ ਪੰਜ ਲੁਟੇਰਿਆਂ ਨੂੰ ਕਾਬੂ ਕਰ ਲਿਆ, ਜਿਹਨਾਂ ਵਿੱਚ ਦੋ ਫੌਜੀ ਸ਼ਾਮਲ ਹਨ ਜੋ ਜੰਮੂ ਕਸ਼ਮੀਰ ਵਿੱਚ ਤਾਇਨਾਤ ਹਨ ਅਤੇ ਹੁਣ ਛੁੱਟੀ ਆਏ ਹੋਏ ਸਨ।
ਪੁਲਿਸ ਨੇ ਲੁਟੇਰਿਆਂ ਤੇ ਮੁਕੱਦਮਾ ਦਰਜ ਕਰਕੇ ਤਫ਼ਤੀਸ ਸੁਰੂ ਕਰ ਦਿੱਤੀ ਹੈ। ਪੁਲਿਸ ਅਨੁਸਾਰ ਇਸ ਘਟਨਾ ਸਮੇਂ ਵਰਤੀ ਗਈ ਏ ਕੇ 47 ਰਾਈਫਲ, ਉਕਤ ਫੌਜੀ ਛੁੱਟੀ ਆਉਣ ਸਮੇਂ ਫੌਜੀ ਛਾਉਣੀ ਚੋਂ ਚੋਰੀ ਕਰਕੇ ਲਿਆਏ ਸਨ। ਇਹਨਾਂ ਫੌਜੀ ਜਵਾਨਾਂ ਨੇ ਆਪਣੇ ਦੋਸਤਾਂ ਨਾਲ ਮਿਲ ਕੇ ਕਰਜ਼ਾ ਚੁਕਾਉਣ ਲਈ ਆਦੇਸ਼ ਹਸਪਤਾਲ ਦੇ ਨਜਦੀਕ ਲੁੱਟ ਖੋਹ ਕੀਤੀ ਸੀ। ਪੁਲਿਸ ਨੇ ਗ੍ਰਿਫਤਾਰ ਕੀਤੇ ਕਥਿਤ ਮੁਲਜਮਾਂ ਨੂੰ ਅਦਾਲਤ ਵਿੱਚ ਪੇਸ਼ ਕਰਕੇ ਪੁਲਿਸ ਰਿਮਾਂਡ ਹਾਸਲ ਕਰ ਲਿਆ ਹੈ।
ਸ੍ਰੀ ਨਰਿੰਦਰ ਸਿੰਘ ਐੱਸ ਪੀ ਸਿਟੀ ਨੇ ਦੱਸਿਆ ਕਿ 11 ਮਾਰਚ ਨੂੰ ਆਦੇਸ਼ ਹਸਪਤਾਲ ਦੇ ਨਜਦੀਕ ਹੋਟਲ ਗਰੀਨ ਵਿੱਚ ਤਿੰਨ ਨੌਜਵਾਨਾਂ ਨੇ ਦਾਖ਼ਲ ਹੋ ਕੇ ਅੱਠ ਹਜ਼ਾਰ ਰੁਪਏ ਲੁੱਟੇ ਸਨ, ਇਹ ਘਟਨਾ ਸੀ ਸੀ ਟੀ ਵੀ ਕੈਮਰੇ ਵਿੱਚ ਕੈਦ ਹੋ ਗਈ ਸੀ। ਇਸ ਸਬੰਧੀ ਹੋਟਲ ਮਾਲਕ ਲਵ ਗਰਗ ਦੀ ਸਿਕਾਇਤ ਤੇ ਥਾਨਾ ਕੈਂਟ ਬਠਿੰਡਾ ਵਿੱਚ ਮੁਕੱਦਮਾ ਦਰਜ ਕਰਕੇ ਜਾਂਚ ਕੀਤੀ ਜਾਾ ਰਹੀ ਸੀ। ਜਾਂਚ ਦੌਰਾਨ ਇਹ ਸਪਸਟ ਹੋ ਗਿਆ ਸੀ ਕਿ ਲੁੱਟ ਮਾਰ ਕਰਨ ਵਾਲੇ ਛੇ ਦੋਸ਼ੀ ਸਨ, ਜਿਹਨਾਂ ਚੋਂ ਤਿੰਨ ਬਾਹਰ ਬੈਠੇ ਰਹੇ ਸਨ। ਇਹਨਾਂ ਲੁਟੇਰਿਆਂ ਦੀ ਭੁੱਚੋ ਖੇਤਰ ਵਿੱਚ ਹੋਣ ਦੀ ਇਤਲਾਹ ਮਿਲਣ ਤੇ ਪੁਲਿਸ ਨੇ ਚੌਕਸੀ ਵਧਾ ਦਿੱਤੀ ਸੀ ਅਤੇ ਇੱਕ ਸੰਖੇਪ ਮੁਕਾਬਲੇ ਪਿੱਛੋਂ ਉਹਨਾਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਮੁਕਾਬਲੇ ਦੌਰਾਨ ਇੱਕ ਮੁਲਜਮ ਸਤਵੰਤ ਸਿੰਘ ਵਾਸੀ ਕੋਟਸ਼ਮੀਰ ਲੱਤ ਵਿੱਚ ਗੋਲੀ ਲੱਗਣ ਕਾਰਨ ਜਖ਼ਮੀ ਹੋ ਗਿਆ, ਜਿਸਨੂੰ ਸਿਵਲ ਹਸਪਤਾਲ ਬਠਿੰਡਾ ਵਿਖੇ ਦਾਖ਼ਲ ਕਰਵਾਇਆ ਗਿਆ। ਪੁਲਿਸ ਨੇ ਮੁਲਜਮਾਂ ਪਾਸੋਂ ਏ ਕੇ 47 ਰਾਈਫਲ ਅਤੇ ਕਾਰ ਬਰਾਮਦ ਕਰ ਲਈ ਹੈ। ਐੱਸ ਪੀ ਨੇ ਦੱਸਿਆ ਕਿ ਇਸ ਲੁੱਟਮਾਰ ਦੇ ਮਾਸਟਰਮਾਈਂਡ ਸਤਵੰਤ ਸਿੰਘ ਉਰਫ ਮਰਾਜ ਕਾ ਵਾਸੀ ਕੋਟਸ਼ਮੀਰ ਜਿਲ੍ਹਾ ਬਠਿੰਡਾ, ਹਰਗੁਣ ਸਿੰਘ ਉਰਫ ਹੈਰੀ ਵਾਸੀ ਸਰਦੂਲਗੜ੍ਹ ਜਿਲਾ ਮਾਨਸਾ, ਅਰਸਦੀਪ ਸਿੰਘ ਉਰਫ ਹਰਸ਼ ਵਾਸੀ ਤਲਵੰਡੀ ਸਾਬੋ ਜਿਲ੍ਹਾ ਬਠਿੰਡਾ, ਅਰਸ਼ਦੀਪ ਸਿੰਘ ਵਾਸੀ ਕੋਟਸ਼ਮੀਰ ਜਿਲ੍ਹਾ ਬਠਿੰਡਾ, ਗੁਰਦੀਪ ਸਿੰਘ ਉਰਫ ਦੀਪ ਵਾਸੀ ਸਾਹੋਕੇ ਜਿਲਾ ਮੋਗਾ, ਸੁਨੀਲ ਕੁਮਾਰ ਉਰਫ ਬਿੱਟੂ ਵਾਸੀ ਮੱਲ ਕੇ ਜਿਲ੍ਹਾ ਮੋਗਾ ਨੂੰ ਗਿਰਫਤਾਰ ਕਰ ਲਿਆ ਹੈ