ਸ੍ਰੀ ਫਤਹਿਗੜ੍ਹ ਸਾਹਿਬ/18 ਜੂਨ :
(ਰਵਿੰਦਰ ਸਿੰਘ ਢੀਂਡਸਾ)
ਸਵੱਛ ਸਰਵੇਖਣ ਗ੍ਰਾਮੀਣ—2025 ਤਹਿਤ 19 ਜੂਨ ਤੋਂ ਦੇਸ਼ ਦੇ ਵੱਖ—ਵੱਖ ਰਾਜਾਂ ਵਿੱਚ ਵਿਸ਼ੇਸ਼ ਸਰਵੇਖਣ ਮੁਹਿੰਮ ਦਾ ਆਗਾਜ਼ ਹੋ ਰਿਹਾ ਹੈ ਜਿਸ ਤਹਿਤ ਕੇਂਦਰੀ ਟੀਮਾਂ ਵੱਲੋਂ ਪਿੰਡਾਂ ਦਾ ਦੌਰਾ ਕਰਕੇ ਸਾਫ਼ ਸਫਾਈ ਨੂੰ ਯਕੀਨੀ ਬਣਾਉਣ ਲਈ ਅਪਣਾਏ ਜਾ ਰਹੇ ਮਾਪਦੰਡਾਂ ਨੂੰ ਘੋਖਿਆ ਜਾਵੇਗਾ ਅਤੇ ਇਸ ਦੌਰਾਨ ਹਰ ਪੱਖੋਂ ਸਰਵੋਤਮ ਪਾਏ ਜਾਣ ਵਾਲੇ ਪਿੰਡਾਂ ਨੂੰ ਐਵਾਰਡ ਪ੍ਰਦਾਨ ਕੀਤਾ ਜਾਵੇਗਾ। ਇਹ ਪ੍ਰਗਟਾਵਾ ਡਿਪਟੀ ਕਮਿਸ਼ਨਰ ਡਾ. ਸੋਨਾ ਥਿੰਦ ਨੇ ਅੱਜ ਜਿ਼ਲ੍ਹਾ ਜਲ ਸੈਨੀਟੇਸ਼ਨ ਮਿਸ਼ਨ ਤਹਿਤ ਜਿ਼ਲ੍ਹਾ ਪ੍ਰਬੰਧਕੀ ਕੰਪਲੈਕਸ ਵਿਖੇ ਆਯੋਜਿਤ ਮੀਟਿੰਗ ਦੌਰਾਨ ਕੀਤਾ।ਉਨ੍ਹਾਂ ਨੇ ਦੱਸਿਆ ਕਿ ਟੀਮਾਂ ਵੱਲੋਂ ਜਿ਼ਲ੍ਹਾ ਫਤਹਿਗੜ੍ਹ ਸਾਹਿਬ ਦੇ 20 ਪਿੰਡਾਂ ਵਿੱਚ ਇਹ ਦੌਰੇ ਕੀਤੇ ਜਾਣਗੇ ਜਿਸ ਵਿੱਚ ਘਰਾਂ, ਜਨਤਕ ਸਥਾਨਾਂ ਜਿਵੇਂ ਸਕੂਲਾਂ, ਆਂਗਣਵਾੜੀ ਕੇਂਦਰਾਂ, ਪੰਚਾਇਤ ਘਰਾਂ, ਬ਼ਜ਼ਾਰਾਂ, ਪਬਲਿਕ ਟੁਆਇਲਟ, ਸਿਹਤ ਸੇਵਾਵਾਂ ਆਦਿ ਵਿੱਚ ਸਵੱਛਤਾ ਨੂੰ ਦੇਖਿਆ ਜਾਵੇਗਾ।ਡਿਪਟੀ ਕਮਿਸ਼ਨਰ ਨੇ ਦੱਸਿਆ ਕਿ ਇਨ੍ਹਾਂ ਪਿੰਡਾਂ ਵਿੱਚ ਅਮਲੋਹ ਬਲਾਕ ਦਾ ਪਿੰਡ ਫਤਹਿਗੜ੍ਹ ਨੀਵਾਂ, ਕੁੰਭ, ਰਤਨ ਪਾਲੋਂ, ਸਲਾਣੀ, ਸ਼ਾਹਪੁਰ, ਬਲਾਕ ਬਸੀ ਪਠਾਣਾ ਦਾ ਪਿੰਡ ਡਡਿਆਣਾ, ਨਨਹੇੜੀ, ਸ਼ਹਿਜਾਦਪੁਰ, ਬਲਾਕ ਖਮਾਣੋ ਦਾ ਪਿੰਡ ਬਰਵਾਲੀ ਖੁਰਦ, ਭਾਂਬਰੀ, ਖੇੜੀ ਨੌਧ ਸਿੰਘ, ਸ਼ਮਸ਼ਪੁਰ, ਠੀਕਰੀਵਾਲਾ, ਬਲਾਕ ਖੇੜਾ ਦਾ ਪਿੰਡ ਬਲਾਹੜੀ ਕਲਾਂ, ਬਰਾਸ, ਰਾਜਿੰਦਰਗੜ੍ਹ, ਡੱਡੂਮਾਜਰਾ, ਸੱਦੋਮਾਜਰਾ, ਢੋਲਾਂ ਅਤੇ ਬਲਾਕ ਸਰਹਿੰਦ ਦਾ ਪਿੰਡ ਸੰਗਤਪੁਰ ਸੋਢੀਆਂ (ਨਈਂ ਆਬਾਦੀ) ਸ਼ਾਮਲ ਹਨ। ਉਨ੍ਹਾਂ ਦੱਸਿਆ ਕਿ ਸਰਵੇਖਣ ਲਈ ਪ੍ਰਤੀ ਪਿੰਡ ਕੁੱਲ 1000 ਅੰਕ ਨਿਰਧਾਰਤ ਕੀਤੇ ਗਏ ਹਨ ਅਤੇ ਵਧੇਰੇ ਅੰਕ ਲੈਣ ਵਾਲੇ ਪਿੰਡਾਂ ਨੂੰ ਐਵਾਰਡ ਲਈ ਚੁਣਿਆ ਜਾਵੇਗਾ। ਡਿਪਟੀ ਕਮਿਸ਼ਨਰ ਡਾ. ਸੋਨਾ ਥਿੰਦ ਨੇ ਪਿੰਡਾਂ ਦੇ ਨਿਵਾਸੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਜੂਨ ਤੋਂ ਸਤੰਬਰ ਦੇ ਦਰਮਿਆਨ ਹੋਣ ਵਾਲੇ ਇਸ ਸਰਵੇਖਣ ਦੌਰਾਨ ਹਰ ਪੱਖੋਂ ਆਪਣੇ ਪਿੰਡਾਂ ਨੂੰ ਮੋਹਰੀ ਬਣਾਉਣ ਲਈ ਯੋਗਦਾਨ ਪਾਉਣ।ਮੀਟਿੰਗ ਦੌਰਾਨ ਐਕਸੀਅਨ ਜਲ ਸਪਲਾਈ ਤੇ ਸੈਨੀਟੇਸ਼ਨ ਇਸ਼ਾਨ ਕੌਸ਼ਲ, ਉਪ ਮੰਡਲ ਇੰਜੀਨੀਅਰ ਗੌਤਮ ਜਿੰਦਲ, ਉਪ ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਕਮਲਜੀਤ ਕੌਰ, ਸੀ.ਡੀ.ਐਸ ਸੁਖਦੀਪ ਸਿੰਘ, ਆਈ.ਈ.ਸੀ ਸਪੈਸ਼ਲਿਸਟ ਕੇਵਲ ਕ੍ਰਿਸ਼ਨ ਸ਼ਰਮਾ ਵੀ ਹਾਜ਼ਰ ਸਨ।