ਡੇਰਾਬੱਸੀ, 18 ਜੂਨ (ਰਾਜੀਵ ਗਾਂਧੀ)
ਡੇਰਾਬੱਸੀ ਹੈਬਤਪੁਰ ਰੋਡ ਤੇ ਸਥਿਤ ਵੀਆਈਪੀ ਇਨਕਲੇਵ ਦੇ ਵਿੱਚ ਚੋਰਾਂ ਨੇ ਵੱਡੀ ਘਟਨਾ ਨੂੰ ਅੰਜਾਮ ਦਿੰਦਿਆਂ ਘਰ ਚੋਂ ਕਰੀਬ 25-30 ਲੱਖ ਦੀ ਨਗਦੀ ਅਤੇ 30-35 ਲੱਖ ਰੁਪਏ ਦੇ ਗਹਿਣਿਆ ਤੇ ਹੱਥ ਸਾਫ ਕਰ ਦਿੱਤਾ। ਚੋਰੀ ਦੀ ਵੱਡੀ ਵਾਰਦਾਤ ਮਗਰੋਂ ਪੁਲਿਸ ਦੇ ਆਹਲਾ ਅਧਿਕਾਰੀ ਇਸ ਮਾਮਲੇ ਦੀ ਗੁੱਥੀ ਸੁਲਝਾਉਣ ਟੀਮਾਂ ਗਠਿਤ ਕਰਕੇ ਸੀਸੀ ਟੀਵੀ ਕੈਮਰੇਆ ਅਤੇ ਹੋਰਨਾਂ ਆਧੁਨਿਕ ਵਿਧੀਆਂ ਰਾਹੀਂ ਜੁਟੇ ਹੋਏ ਹਨ। ਪੁਲਿਸ ਮੁਤਾਬਕ ਜਲਦ ਹੀ ਚੋਰਾਂ ਨੂੰ ਕਾਬੂ ਕਰ ਲਿਆ ਜਾਵੇਗਾ। ਚੋਰ ਜਾਣ ਵੇਲੇ ਘਰ ਦੇ ਕੈਮਰਿਆਂ ਦੀ ਲੱਗੀ ਡੀਵੀਆਰਵੀ ਕੱਢ ਕੇ ਲੈ ਗਏ।
ਮਿਲੀ ਜਾਣਕਾਰੀ ਅਨੁਸਾਰ ਸੁਧੀਰ ਪੁੱਤਰ ਜਗਦੀਸ਼ ਮਕਾਨ ਨੰਬਰ 155 ਵੀਆਈਪੀ ਇਨਕਲੇਵ ਵਿੱਚ ਰਹਿੰਦਾ ਹੈ ਹੈ ਜਿਸ ਦਾ ਜੀਰਕਪੁਰ ਵਿਖੇ ਹੋਟਲਾਂ ਦਾ ਕਾਰੋਬਾਰ ਹੈ। ਸੁਧੀਰ ਨੇ ਦੱਸਿਆ ਕਿ ਉਸ ਦੀ ਪਤਨੀ ਪੇਕੇ ਘਰ ਗਈ ਹੋਈ ਸੀ ਤੇ ਮਕਾਨ ਨੂੰ ਜਿੰਦਰਾ ਲਗਾਇਆ ਹੋਇਆ ਸੀ। ਉਹ ਪਿਛਲੇ ਕੁਝ ਦਿਨਾਂ ਤੋਂ ਆਪਣੇ ਮਕਾਨ ਵਿੱਚ ਨਹੀਂ ਆਇਆ। ਉਹਨਾਂ ਦੱਸਿਆ ਕਿ 16 ਤਰੀਕ ਸ਼ਾਮ ਨੂੰ ਸੋਸਾਇਟੀ ਦੇ ਪ੍ਰਧਾਨ ਦਾ ਫੋਨ ਆਇਆ ਕਿ ਤੁਹਾਡੇ ਘਰ ਦੀ ਲਾਈਟ ਜਗ ਰਹੀ ਹੈ। ਇਸ ਮਗਰੋਂ ਉਹ ਘਰ ਪਹੁੰਚਿਆ ਤਾਂ ਵੇਖਿਆ ਮੇਨ ਗੇਟ ਤੇ ਜਿੰਦਰਾ ਲੱਗਿਆ ਹੋਇਆ ਸੀ ਜਦੋਂ ਕਿ ਘਰ ਦਾ ਮੇਨ ਦਰਵਾਜ਼ਾ ਦਾ ਜਿੰਦਾ ਟੁੱਟਿਆ ਹੋਇਆ ਸੀ, ਅੱਗੇ ਵੇਖਿਆ ਤਾ ਘਰ ਦਾ ਸਮਾਨ ਖਿਲਰਿਆ ਹੋਇਆ ਮਿਲਿਆ। ਸੁਧੀਰ ਨੇ ਦੱਸਿਆ ਕਿ ਉਸ ਦਾ ਪਹਿਲੀ ਮੰਜ਼ਿਲ ਤੇ ਇੱਕ ਕਮਰੇ ਵਿੱਚ ਡਿਜੀਟਲ ਲਾਕਰ ਸੀ , ਜਿਸ ਨੂੰ ਚੋਰਾਂ ਨੇ ਖੋਲਣ ਦੀ ਕਾਫੀ ਕੋਸ਼ਿਸ਼ ਕੀਤੀ ਪ੍ਰੰਤੂ ਜਦੋਂ ਨਾ ਖੁੱਲਿਆ ਤਾਂ ਉਹ ਲਾਕਰ ਹੀ ਪੁੱਟ ਕੇ ਲੈ ਗਏ। ਲਾਕਰ ਵਿੱਚ ਕਰੀਬ 25-30 ਲੱਖ ਰੁਪਏ ਦਾ ਨਗਦੀ ਸੀ ਅਤੇ ਪਤਨੀ ਦੇ ਕਰੀਬ 30-35 ਲੱਖ ਰੁਪਏ ਦੇ ਗਹਿਣੇ ਸਨ। ਇਸ ਤੋਂ ਇਲਾਵਾ ਘਰ ਦੇ ਸਾਰੇ ਸਮਾਨ ਵੀ ਖਿਲਾਰ ਦਿੱਤਾ ਗਿਆ। ਜਾਣ ਵੇਲੇ ਚੋਰ ਘਰ ਵਿੱਚ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀ ਡੀਵੀਆਰ ਪੁੱਟ ਕੇ ਲੈ ਗਏ। ਇਸ ਤੋਂ ਬਾਅਦ ਉਹਨਾਂ ਨੇ ਇੱਕ ਘਰ ਛੱਡ ਕੇ ਬੰਦ ਮਕਾਨ ਨੂੰ ਨਿਸ਼ਾਨਾ ਬਣਾਇਆ, ਜਿਸ ਦੀ ਛੱਤ ਉੱਪਰ ਮੋਂਟੀ ਦਾ ਦਰਵਾਜ਼ਾ ਖੁੱਲਾ ਦੇਖ ਕੇ ਅੰਦਰ ਵੜ ਗਏ , ਪੌੜੀਆਂ ਘਰ ਦੇ ਅੰਦਰ ਹਾਲ ਵਿੱਚ ਉਤਰਦੀਆਂ ਹਨ, ਹਾਲ ਵਿੱਚ ਸੀਸੀਟੀਵੀ ਕੈਮਰੇ ਦੇ ਡੀਵੀਆਰ ਕੱਢ ਕੇ ਲੈ ਗਏ ਜਿੱਥੇ ਕਿ ਉਹਨਾਂ ਨੇ ਹੋਰ ਨੁਕਸਾਨ ਨਹੀਂ ਕੀਤਾ।
ਇਸ ਮਾਮਲੇ ਸਬੰਧੀ ਮੁਬਾਰਕਪੁਰ ਪੁਲਿਸ ਚੌਂਕੀ ਇੰਚਾਰਜ ਗੁਰਵਿੰਦਰ ਸਿੰਘ ਨੇ ਦੱਸਿਆ ਕਿ ਪੁਲਿਸ ਆਧੁਨਿਕ ਪ੍ਰਣਾਲੀ ਤਹਿਤ ਚੋਰਾਂ ਨੂੰ ਗ੍ਰਿਫਤਾਰ ਕਰਨ ਵਿੱਚ ਲੱਗੀ ਹੋਈ ਹੈ ਜਲਦ ਹੀ ਚੋਰਾਂ ਨੂੰ ਕਾਬੂ ਕਰ ਲਿਆ ਜਾਵੇਗਾ। ਉਹਨਾਂ ਦੱਸਿਆ ਕਿ ਪੁਲਿਸ ਟੀਮਾਂ ਲਗਾਤਾਰ ਲੱਗੀਆਂ ਹੋਈਆਂ ਹਨ।